«Башҡортостан Республикаһы» нәшриәт йортоноң журналистар төркөмө махсус хәрби операция зонаһына эш командировкаһынан ҡайтты.
Улар Запорожье өлкәһенә ике миссия менән юлланды – Матбуғат йортонан, Өфөнөң 21-се лицейынан, яугирҙәрҙең туғандарынан һәм яҡындарынан гуманитар ярҙам алып барырға, шулай уҡ хәрби хәрәкәттәрҙә ҡатнашҡан коллегалары менән аралашырға, тип хәбәр итә «Молодежная газета» баҫмаһы.
Яугирҙәргә Өфө журналистары әҙерләгән ҡорамалдар һәм төҙөлөш материалдары, сәк-сәк, балалар хаттары, медикаменттар, китаптар, яңы матбуғат, өйҙән шәхси посылкалар тапшырылды.
– Ошо көндәрҙә беҙҙе мобилизациялауға теүәл өс йыл тулды. Тыуған республикабыҙға, яҡташтарыбыҙға беҙҙең хаҡта уйлағанығыҙ һәм ярҙам иткәнегеҙ өсөн рәхмәт. Балаларҙың бөтә хаттарын тулҡынланып уҡыйбыҙ, өйҙөң еҫен тоябыҙ, башҡорт тәм-томдары менән бушаған арала сәй эсәбеҙ, гәзит-журналдарҙы ҡараштырабыҙ, әсәләрҙән посылкалар алабыҙ. Һеҙҙең хәстәрлегегеҙ һәм йылылығығыҙ ҡуйылған бурыстарҙы үтәргә ярҙам итә. Бөтә яҡташ яугирҙәрҙән Башҡортостанға ҙур сәләм, – ти «Уҡытыусы позывнойлы яугир.
Хәрби хеҙмәткәр «Меркурий», танк батальонының ремонт взводы командиры, беҙҙең яугирҙәрҙең кәйефе хәрбиҙәрсә булыуы хаҡында һөйләне.
– Яҡташтар менән осрашыуыбыҙға һәм посылкалар алыуыбыҙға һәр саҡ шатбыҙ. Егеттәребеҙгә – афарин, аныҡ, намыҫлы эшләйҙәр. Башҡортостанға – сәләм һәм Республика көнө менән ҡотлауҙар!
Журналистар Днепрорудный ҡалаһының «Горный» спорт мәктәбенә лә барҙы. Бында өлкә Рәсәй Федерацияһына ҡушылғандан һуң бокс залын тулыһынса яңыртҡандар, спортсыларҙы кәрәкле экипировка менән тәьмин иткәндәр, шулай уҡ атыу тиры асҡандар.
Спорт мәктәбе директоры Андрей Захаров һүҙҙәренсә, бында балалар ГТО нормаларын тапшырыуға һәм армияла хеҙмәт итеүгә әҙерләнә.
Республика мәғлүмәт үҙәге директоры Айнур Дәүләтбәков тирға ике яңы пневматик винтовка тапшырҙы.
– Балаларыбыҙ хаҡында хәстәрлек күргәндәре өсөн ҙур рәхмәт! Күнекмәләрҙә беҙ малайҙарҙы ысын ир-егет булырға өйрәтәбеҙ. Был йәһәттән беҙгә хәрбиҙәр ҙә, шул иҫәптән Башҡортостандан да ярҙам итәләр. Ваҡыты-ваҡыты менән бергәләп күнекмәләр үткәрәбеҙ, улар тәжрибә уртаҡлаша, һорауҙарға яуап бирә, үҙ миҫалында Ватанға тоғролоҡтоң нимә икәнен күрһәтә. Бындай хеҙмәттәшлек баһалап бөткөһөҙ, сөнки бөгөнгө уҡыусыларыбыҙ – Рәсәйҙең буласаҡ яҡлаусылары. Уларға ҡулдарына ҡорал тотоп ил мәнфәғәттәрен яҡларға тура килмәҫ, һәм улар һаҡта ғына торор, тип ышанабыҙ. Беҙ еңәсәкбеҙ! Һис шикһеҙ! – тине Андрей Захаров.
Фото: «Молодежная газета»