Ленинград облаçĕнчи Туслăх çуртĕнче Максим Кузнецовăн «Эпĕ чăвашла калаçатăп. Чувашский язык с нуля: Самоучитель для начинающих» кĕнекен хăтлавĕ иртнĕ.
Асăннă кĕнеке Тутарстан Республикин Хусан хулинчи кĕнеке издательствинче пичетленсе тухнă. Авторĕ Раççей наукăсен академин (РАН) Хусанти наука центрĕн нумай факторлă гуманитари анализĕ тата когнитивлă филологи лабораторин ăслăлăх ĕçченĕ, çамрăк ăсчах-лингвист, куçаруçă, журналист, поэт. Маларах унăн «Русские черты в вепсском синтаксисе» (2018), «Коренные народы Ленинградской области и их современные праздники» (2021), «Татарский язык с нуля: самоучитель для начинающих» (2022), «Elo» (сборник стихов на вепсском языке, 2023) кĕнекисем тухнă.
Чăваш чĕлхине хăв тĕллĕн вĕренмелли çĕнĕ кĕнеке Тутарстан Республикин Пуçлăхĕ Рустам Минниханов çумĕнчи тутар тата Тутарстанра пурăнакан ытти халăхсен тăван чĕлхисене упраса хăварассипе, аталантарассипе ĕçлекен комисси (председателĕ – Марат Ахметов) пулăшнипе Хусанти наука центрĕн лабораторинче «Тутарстан Республикин халăхĕсен чĕлхисемпе культури» кĕнеке серийĕпе тухнă.
Максим Кузнецов çак йĕркесен авторĕпе тĕл пулнă хыççăн чăваш чĕлхипе кĕнеке кăларма шут тытнă. Эпĕ автора Никита Яковлевич Бичурин çинчен каласа патăм. Максим чăваш чĕлхине 2023 çулхи апрель уйăхĕнче çеç вĕренме пуçланă, çак вăхăтчен ăна пачах та пĕлмен. Икĕ уйăх хушшинче чăваш тата вырăс чĕлхисемпе çырнă тĕрлĕ учебниксемпе, академи çăлкуçĕсемпе усă курса чăваш чĕлхин грамматикине алла илнĕ. Нимĕç тата поляк чĕлхипе çырнă çăлкуçсемпе те усă курнă. Хăв тĕллĕн вĕренмелли кĕнекене 2023 çулхи июнь уйăхĕнчен пуçласа 2024 çулхи апрель уйăхĕччен хатĕрленĕ, чăваш грамматикин пур енĕсене те шута илекен пысăк ĕç туса ирттернĕ. Вăл калăпăшĕпе пысăк пулнипе кĕнекен пĕрремĕш пайне пичетлесе кăларма йышăннă. Унта чăваш чĕлхине ăнланма тата вулама, ансат текстсем йĕркелеме вĕрентнĕ.
Автор «Хавал» пуçару ушкăнĕн координаторне, чăваш тата ют чĕлхесен преподавательне Александр Блинова, филологи наукисен кандидатне, Чăваш патшалăх культурăпа искусство институчĕн доцентне Эдуард Фомина тата Чăваш патшалăх гуманитари наукисен филологи юхăмĕн ĕçченне Эдуард Лебедева, кĕнекене рецензиленĕ филологи наукисен докторне, И.Н. Ульянов ячĕллĕ Чăваш патшалăх университечĕн чăваш филологипе культурин кафедрин профессорне Галина Семенована (Эдуард Фомин та рецензент пулнă), кĕнекен наука редакторне, филологи тата техника наукисен кандидатне Павел Желтова, чăваш чĕлхине пĕлмесен та çак ĕçре пысăк тимлĕхпе явап уйăрнă Тутар кĕнеке издательствин редакторне Энже Хуснутдинована тав тăвать.
Кĕнеке хăтлавĕнче экономика наукисен кандидачĕ, Чăваш Республикин культурăн тава тивĕçлĕ ĕçченĕ, П. Ф.Лесгафт ячĕллĕ наци патшалăх университечĕн кафедра доценчĕ Валериан Гаврилов, чăваш ентешлĕхĕ çумĕнчи хĕрарăмсен Канашĕн председателĕ, Ленинград облаçĕнчи чăваш культура обществин председателĕн çумĕ Анастасия Степанова, «Ахаяс» чăваш хореографи ансамблĕн ертÿçи Пелагея Терентьева, «ШийКорно» мари наци культура автономин председателĕ Лариса Арламова тухса сăмах каланă.
«Эпĕ чăвашла калаçатăп. Чувашский язык с нуля: Самоучитель для начинающих» çывăх вăхăтра Тутар кĕнекен издательствин лавккисене тата tatkniga.ru сайтра сутлăха тухĕ.
Валериан ГАВРИЛОВ, Раççейри чăвашсен федераллă наципе культура автономи Канашĕн пайташĕ.