🤱14 кастрычніка праваслаўныя вернікі святкуюць Пакроў Прасвятой Багародзіцы па юліянскім календары. Менавіта з гэтай нагоды Дзень маці ў Беларусі адзначаецца сёння
У кастрычніку 2010 года, роўна 15 гадоў таму, у Гродне каля кафедральнага Пакроўскага сабора ўсталявалі і асвяцілі скульптуру з аднайменнай назвай, паведамляе Telegram-канал @Hrodna 11:27.
Аўтар кампазіцыі — гродзенскі скульптар Уладзімір Панцялееў. Ідэя з’явілася прыкладна за паўтара года да ўстаноўкі, вобраз і месца для скульптуры ён выбіраў разам са святарамі.
Бронзавая скульптура мае вышыню тры метры, а разам з гранітным пастаментам — 4,2 метра. Манумент узводзіўся ў асноўным на сродкі праваслаўных мецэнатаў.
Асвячэнне было прымеркавана не толькі да свята Пакрова, але і да 110-годдзя стварэння Гродзенскай епархіі. Да гэтай даты гістарычны Telegram-канал падрыхтаваў некалькі архіўных фотаздымкаў працэсу ўстаноўкі скульптуры.
