Адыгэ лъэпкъ шъуашэм и Мафэ фэгъэхьыгъэ мэфэк1 зэхахьэ лъэпкъ культурэм игупчэ щырек1ок1ыгъ

Адыгэ лъэпкъ шъуашэм и Мафэ фэгъэхьыгъэ мэфэк1 зэхахьэ лъэпкъ культурэм игупчэ щырек1ок1ыгъ.

Ащ къеблэгъагъэхэм ш1уфэс сэлам къарахыгъэх зэхахьэм ик1эщак1охэу- Шэуджэн районым ипащэу Аулъэ Рэщыдэрэ Адыгэ Хасэм итхьэматэу Л1ымыщэкъо Рэмэзанрэ.

Мэфэк1ым хэлэжьагъэх адыгэ шъошэд 1азэу, АР-м культурэмк1э изаслуженнэ 1офыш1эу Сташ1у Юр, Адыгэ Хасэм итхьэматэу Л1ымыщэкъо Рэмэзан, Адыгэ Хасэм икъутамэ щыщхэр, Тыркуем къик1ыгъэ хьак1эхэр, чылэдэсхэр.

Зэхахьэм къек1ол1агъэхэм адыгэ шъуашэм имэфэк1 мафэк1э къафэгуш1уагъ Сташ1у Юрэ, ишъуашэхэм якъэбар къафи1отагъ.

Аулъэ Рэщыд адыгэ шъуашэм идэхагъэ тыдэк1и зэлъязгъэш1агъэу Сташ1у Юрэ имэфэк1 мафэк1э фэгуш1уагъ, рэзэныгъэ тхылъ ш1ухьафтын игъусэу фигъэшъошагъ. Мыгъэ 1оныгъом и 28-м ащ ыныбжь илъэс 94-рэ зэрэхъугъэр къыхигъэунэфык1ыгъ.

Зэхахьэр лъагъэк1отагъ адыгэ шъошэд 1азэхэу Бэджэкъо Бэлл, Пэунэжъ Марин, Хьапэк1э Римм, Ожъ Марин, Хъот Даян - ахэмэ я1эш1агъэхэр сценам дахэу къыщагъэлъэгъуагъ.

Зэхащэр яорэд дахэхэмк1э къагъэбаигъ АР-м, Абхъазым, Къыблэ Осетием, Къэбэртэе - Бэлкъарым ык1и Къэрэщэе - Щэрджэсым язаслуженнэ артистэу Лъачэ Альберт, орэды1оу Хьаткъо Расит, тилъэпкъэгъоу, Тыркуем къик1ыгъэ пщынаоу Брант1 Месут, лъэпкъ культурэм игупчэ и1офыш1эхэр.

Мэфэк1ыр адыгэ джэгу дахэк1э зэфаш1ыжьыгъ, мыщ анахь дахэу, шэн-хабзэхэм атетэу къэшъуагъэхэм, Адыгэ Хасэм ш1ухьафтынхэр афигъэшъошагъэх.

Зэрэхабзэу джэгур удж хъураек1э зэфаш1ыжьыгъ.

#Шовгеновскийрайон #новости #администрация