Тирмән һәм Урмантау ауылдарындағы белем усаҡтары федераль программа ярҙамында заманса итеп эшләнде
Мәктәптәрҙе капиталь ремонт программаһы Рәсәй Президенты Владимир Путиндың башланғысы менән тормошҡа ашырыла. Программа федераль бюджеттан финанслана. Башҡортостан ремонтланған мәктәптәр һаны буйынса илдә 2-се урынды биләй – 181 мәктәп! Республика Башлығы Радий Хәбиров был мәсьәләне шәхси контролдә тота, һәр ваҡыт эш барышын күҙәтеп бара. Сөнки уның өсөн балаларҙың киләсәге һәм белем сифаты төп өҫтөнлөк булып һанала. Киләһе йылда республика тағы 3 миллиард һумға мәктәптәрҙе ремонтлай аласаҡ.
Салауат районында федераль программа буйынса ике мәктәпкә капиталь ремонт эшләнде. 2022 йылда – Сафуан Әлибаев исемендәге Тирмән урта мәктәбе, 2023 йылда Урмантау төп мәктәбе биналалары төҙөкләндерелде. Был “стеналарҙы буяу” ғына түгел, ә белем биреүҙең сифатын бөтөнләй үҙгәрткән инфраструктураны комплекслы яңыртыу. Беҙҙең район миҫалында элекке совет осоронда төҙөлгән мәктәптәр хәҙерге заман зауығына килтереп эшләнгәнен күрергә була.
Сафуан Әлибаев исемендәге Тирмән урта мәктәбе директоры Лариса МӨХӘМӘТОВА:
– Беҙҙең мәктәп 1975 йылда төҙөлгән. Илле йылға яҡын ундай ремонт булғаны юҡ ине. Бина ныҡ иҫкергәйне, һыуыҡ шарттарҙа уҡырға, эшләргә тура килде. Урындағы башланғыстарҙы яҡлау программаһы буйынса өлөшләтә тәҙрәләрҙе генә алмаштыра алдыҡ.
Капиталь ремонт барышында элекке бинаның стеналары ғына ҡалды. Ҡалғаны, ҡыйығынан иҙәненә тиклем, тулыһынса яңыртып ҡоролдо. Туҡланыу блогы ла эшләнде. Өҫтәүенә, республика ярҙамында мәктәп өр-яңы мебелдәр, ҡорамалдар менән йыһазландырылды.
Хәҙер бына өс йыл инде йылы, яҡты, барлыҡ шарттары булған мәктәптә уҡыйбыҙ. Әлбиттә, бина утын менән яғып йылытыла. Шулай ҙа йылы. Ауылыбыҙға быйыл газ үтте. Мәктәпте лә газға тоташтырыу планлаштырыла, уның проекты бар.
Һүрәттәрҙә: Тирмән һәм Урмантау мәктәптәре капиталь ремонттан һуң.