“Башҡорт аты” IV халыҡ-ара фестивале Баймаҡ районының Граф күле янында үтте. Был күләмле сараға Рәсәйҙең 12 төбәгенән вәкилдәр һәм 17 сит илдән ҡунаҡтар килгәйне.
Башҡортостан Башлығы Радий Хәбиров “Башҡорт аты” фестивален асыу тантанаһында, унда ҡатнашыусыларҙы сәләмләп, сығыш яһаны. Был башҡорт тоҡомло аттарға арналған ҙур ғилми-мәғрифәтселек һәм мәҙәни-спорт сараһының республикала 2022 йылдан алып үткәрелеүен билдәләне ул.
Фестиваль йылҡысылыҡ һәм ҡымыҙ эшләү традицияларын һаҡлауға һәм үҫтереүгә йүнәлтелгән. Граф күле эргәһенә атлылар, спортсылар, ғалимдар йыйылғайны. Фестивалдең тантаналы өлөшөн театрлаштырылған тамаша һәм аттар парады асты.
“Башҡорт аты” гимнының исем туйы фестивалде асыу тантанаһының иң сағыу ваҡиғаһы булды. Сараның төп йырына конкурс иғлан ителгәйне. Композитор Рәмил Туйсин еңеүсе булды. Ул “Башҡорт аты” гимнының барлыҡҡа килеү тарихын һөйләне.
Ат сабыштары бар халыҡтың иғтибарын яулаған матур тамаша булды. Тоҡомло hәм ярым тоҡомло, башҡорт тоҡомло аттар ярыштары, “Бәйге” сабыштары алты hәм ете саҡрым дистанцияларҙа уҙғарылды.
Беҙҙең райондан унда Әлкә ауылынан Айрат Ғәйнетдинов үҙенең Бөркөт ҡушаматлы аты, Арҡауылдан Булат Юлдашев Башҡорт, Серко, ә Яҙғыйорттан Илшат Закиров Снайпер ҡушаматлы аты менән ҡатнашты. Улар еңеүсе булмаһа ла, призлы урын алмаһа ла, ярыштан сәмләнеп ҡайтты.
Шулай уҡ фестивалдә милли көрәш, мас-рестлинг, “Тәңкә алыу”, “Ауҙарыш”, “Ылаҡ” ярыштары, “Бәйге” халыҡ-ара спорт уйыны ла булды. “Оҫталар ҡаласығы”, республика Хәрби Дан музейы, 112-се Башҡорт кавалерия дивизияһы музейының “Башҡортостан Ватан һағында” патриотик майҙансығы һәм халыҡ кәсептәре, һөнәрҙәре оҫталарының күргәҙмәләре лә эшләне.
Лилиә Рамазанова.