Райондың белем биреү учреждениелары “ПАЗ” һәм “ГАЗель”дәр алды
Башҡортостан Башлығы Радий Хәбиров был аҙнала Өфөлә белем биреү учреждениелары директорҙарына мәктәп автобустары һәм еңел автомобилдәрҙең асҡыстарын тапшырҙы.
Яңы уҡыу йылы алдынан Салауат районының биш мәктәбе автобус алды. Атап әйткәндә, Мөрсәлим урта мәктәбенә – “ПАЗ” автобусы, Әлкә, Лаҡлы урта мәктәптәре, Мәсетле, Йыланыш төп мәктәптәренә 16 урынлы “ГАЗель” маркалы микроавтобус бирелде.
– Ғәҙәттәгесә, 1 сентябрь алдынан балаларыбыҙ өсөн яңы техника тапшырабыҙ. Республиканың ҡала һәм райондарына рекордлы һанда – 200-ҙән ашыу автобус һәм машина – юлланасаҡ. Был – көн һайын мәктәпкә йөрөгән балалар өсөн өҫтәмә хәүефһеҙлек, уңайлылыҡ. Мәктәп автобустары водителдәренә мөһим һәм бик кәрәкле хеҙмәте, балаларға ҡарата яҡшы мөнәсәбәте өсөн рәхмәт белдерәм, – тине республика Башлығы Радий Хәбиров тантанала.
Мөрсәлим урта мәктәбе директоры Артур ҒӘЛИУЛЛИН:
– Беҙ бөгөн 23 урынлыҡ яңы “ПАЗ” автобусы алдыҡ. Уны тәжрибәле водителебеҙ Адил Хәсәнов йөрөтәсәк. Хәҙер мәктәптең өс автобусы булды. Мөрсәлим мәктәбенә биш ауылдан: Яңы Сүрәкәй, Ҡарағол, Рус һәм Башҡорт Илсекәйҙәре, Первомайскийҙан, шулай уҡ Мөрсәлимдең тимер юлы аръяғынан, элекке Ҡалмаҡолдан, балалар йөрөп уҡый. Яңы автобус бирелеүе ҡыуаныслы ваҡиға. Уҡыусыларға белем алыу өсөн өҫтәмә шарттар тыуҙырылды. Республика етәкселегенең мәғариф өлкәһенә ҙур иғтибар биреүенә шатбыҙ һәм рәхмәтлебеҙ.
“ГАЗ”, “ПАЗ”, “УАЗ”, “КАВЗ” автобустары Башҡортостандың 54 районынан һәм алты ҡалаһынан 196 мәктәп өсөн тәғәйенләнгән. “LADA” автомобилдәре Бәләбәй, Белорет, Бөрө, Дыуан райондарындағы, Стәрлетамаҡ, Нефтекама, Сибай, Күмертау һәм Өфөләге психологик-педагогик, медицина һәм социаль ярҙам комиссиялары үҙәктәре һәм филиалдарын хеҙмәтләндерәсәк.
Белешмә:
Башҡортостанда 2 805 тораҡ пункттан 876 белем биреү ойошмаһының 52 756 уҡыусыһы йөрөтөп уҡытыла. Был эшкә 1590 мәктәп автобусы йәлеп ителгән. 2019 йылдан алып мәктәптәр өсөн федераль һәм республика бюджеттары иҫәбенә бөтәһе 900-гә яҡын автобус һатып алынған.