-Ҡаҡты электән ҡоям, бәләкәй сағымдан күреп үҫтем бит

-Ҡаҡты электән ҡоям, бәләкәй сағымдан күреп үҫтем бит. Баҡсабыҙҙа алманың 4-5 төрө үҫте , грушабыҙ ҙа булды .Әнейем аш-һыуға оҫта булды.Ҡаҡты оҫталап фанерала киптерер ине. ти, уңған төркөмдәшебеҙ Ләлә Мозафарова. Емеш - еләгебеҙҙе ҡайҙа инде ул әрәм итеү? Повидло күпләп яһалды, ҡаҡтар ҡойолдо.Ҡауынды ла киптереп алды бер йыл әнейем. Ҡапсыҡ - ҡапсыҡ киптерелгән алманан өҙөлмәнек. Ҡыш буйына ләүәштәр бешерҙек Ләүәшкә эслек- кипкән ер еләге менән повидло , быҡтырылған балан менән повидло , ҡараға, ниндәйҙере генә булманы! Ҡаҡ ҡойоу минең күңелемә яҡын . Бала сағымдың матур хәтирәләре яңыра . Ихлас донъя көткән әней менән әтейем йорто , бай баҡсабыҙҙы күҙ алдыма килтереп, хәтирәләргә сумып, ҡаҡ ҡоям.

Рецебы менән уртаҡлашам әле:

Матурлап алмаларҙы йыуып , ҡабығынан әрсеп , турайым . Әҙ генә һыу йә сейә һутын ҡушып быҡтырам . Дуршлагта һарҡытып тотам һәм дуршлаг аша үткәрәм . Матур ғына иҙелмә әҙер була . Быяла биттәрен үҫемлек майы менән һөртөп алам һәм 4-5 мм ҡалынлығында иҙмәне йәйеп , ҡояшҡа киптерергә ултыртам . Ныҡ йоҡа йәймәйем , һурығып , үҙе кибә . Өҫ яғы кипкәс , йоҡа ғына бысаҡ менән быяланан айырып алып, икенсе яғын тағы ла киптереүгә һалам .Көн ҡояшлы, еле лә булһа, ике көн самаһында ҡаҡ әҙер була .Пергаментҡа урарға, йәки, матурлап, үҙен генә лә урап һаҡларға мөмкин . Табындарҙы йәмләп торорлоҡ тәмлекәс инде ҡаҡ! Сәтләүек ваҡлап, емеш- еләк ҡушып эслек әҙерләп урамалар эшләһәң сәй табыны тағы ла йәмләнер . Таяҡсаларға виноград , ҡаҡ , ҡарағат , ҡаҡ, киҫәктәргә туралған киви , алма , банан ,тағы ла ҡаҡ теҙеү сәй өҫтәленең түрендә булһа насармы? Ҡаҡ ҡойғанда шәкәр ҡомо ҡулланмайым . Алма үҙе бик татлы . Төҫтәре , тәме төрләнһен тип, ҡара ҡарағат , ҡыҙыл ҡарағат , сейә , малина ҡушырға була .Алыҫ юлға алырға уңайлы . Бәләкәй балаларға ла файҙалы . Тәме лә хуш еҫле , һаҡлауға уңайлы.

💥Иң мөһиме , шәкәр ҡомо кәрәкмәй.

💥Банка ла кәрәкмәй ! Әлбиттә, ҡаҡ ҡойоу байтаҡ ҡына ваҡыт талап итә, әммә тырышлыҡ бушҡа китмәй, шатлыҡ - ҡыуаныста туғандар, дуҫ- иштәр менән ҡулланыр ризыҡ ул. Иҫкереп ятмай бкр ҙә , ҡанатлы була торған 🤗!

Урман - дала елдәренә иркәләнеп , ҡыҙыу ҡояш нурҙарына ҡойоноп кипкән ҡағым йомшаҡ булып кибә . Шытырҙап тормай. Тәбиғәтебеҙҙең бер мөғжизәһе бит инде емеш - еләк . Үҙ еребеҙҙең һыуына, уңдырышлы ҡара тупрағына туйынып үҫкән емеш- еләккә ни етә! Мәнфәғәтен күреп шатланайыҡ . Баҡсаларыбыҙға емеш ағастары ултыртайыҡ. Уңыштарыбыҙҙы ҡәҙерләп эшкәртәйек әле. Белгән - өйрәтер , белмәгән өйрәнһен.

Күңелгә ятҡан яҙмаларҙы ҡулланып, үҫтергән уңыштарыбыҙҙың файҙаһын күрәйек.Аҡса емеше түгел , баҡса емеше бит . Ихласлап ҡаҡ ҡойоу үҙе бер кинәнес ! Аштарыбыҙ тәмле , бәрәкәтле булһын! -ти Ләлә апай.

Бына ниндәй матур теләктәргә бай, йор һүҙле лә икән үҙе.

Өйрәнәйек, төркөмләштәр.