🌸Ауғыс, ауғыс, ауғыс

. 🌿АУҒЫС

🌸Ауғыс, ауғыс, ауғыс,

Төн йоҡоһон алғыс.

Билде биштән быуғыс,

Уста башаҡ ыуғыс.

Ауғыс, ауғыс, ауғыс,

Ҡуйы һөттәр һауғыс,

Дәү кәбәндәр һалғыс,

Эштән арып - талғыс.

Ауғыс, ауғыс, ауғыс,

Һалҡын таңдар тыуғыс.

Ағасҡа ау ҡунғыс,

Иген - бесән уңғыс.

Ауғыс, ауғыс, ауғыс,

Күктән йондоҙ яуғыс.

Ергә алма ҡойғос,

Көҙ яҡынын тойғос.

Август, август, август -

Йәйҙән көҙгә ауғыс.

(Таңһылыу Ҡарасурина)