Ошо көндәрҙә Күҫәләр ауылында йәшәүсе Флорида Тәфҡәлүн ҡыҙы Закирова 70 йәшлек юбилейын билдәләй.
Ауыл-ҡатын ҡыҙҙарына һоҡланмау мөмкин түгел. Иртә таңдан тороп, эңер төшкәнсе эштән бушамай улар. Шундай өлгөр, өлгөлө уңғандарҙың береһе – Флорида Закирова тураһында был мәҡәләм.
Ул 1955 йылдың 20 июлендә Дыуан районының элекке Әбсән ауылында донъяға килә. Үҫеп буй еткәс, Флорида Салауат районы Күҫәләр ауылына килен булып төшә. Бында ул хеҙмәт юлын китапханасы булып башлай. Эш ҡулдары етешмәгәс, уны “Йүрүҙән” совхозының Күҫәләр һөтсөлөк фермаһына һауынсы итеп саҡыралар. Бәләкәйҙән был эште күреп үҫкән ҡыҙға фермала эшләү ауыр булмай. Әйткәндәй, уның әсәһе – Сәүиә апай һуғыш йылдарында 13 йәштән фермала эш башлап, 40 йылдан ашыу алдынғы һауынсы булып эшләп, хаҡлы ялға сыға һәм берҙән-бер ҡыҙы ҡарауында йәшәй.
Флорида Тәфҡәлүн ҡыҙы ла һәр саҡ алдынғылар рәтендә була, 1999 – 2000 йылдарҙа район буйынса һауынсылар араһында чемпион исемен яулай.
Алдынғы һауынсы, әүҙем йәмәғәтсе булараҡ, төрлө конференцияларҙа делегат та була, уның тураһында район гәзите биттәрендә бихисап мәҡәләләр ҙә яҙылған. Ул бит 4 тапҡыр район Советы, ике тапҡыр Арҡауыл ауыл советы депутаты итеп тә һайлана.
Ғөмүмән, 1970–1990 йылдарҙа сыҡҡан район гәзиттәрен ҡараһаң, ауыл хужалығы темаһы ҙур урын алыуын күрәһең, алдынғы механизаторҙар, игенселәр, һауынсылар тураһында мәҡәләләр, очерктар күпләп бирелгән, бер һүҙ менән әйткәндә, эш кешеһе почетта булған.
Совет заманында ауыл эшсәндәренә шифаханаларға, сит илдәргә экскурсияларға бушлай путевкалар ҙа күп бирелде. “Берәй ҡайҙа ял итергә барманығыҙмы?”, – тигән һорауға еңгәбеҙ: “Юҡ инде, донъяңды ташлап, һыйырҙарыңды сит кешегә тапшырып, нисек сығып китәһең, бер тапҡыр ҙа ял итергә барманым, хатта отпускыға һирәк сыҡтым”, – тип иҫләй ул хеҙмәт дәүерен.
Бына шундай илһөйәрҙәр, эшһөйәрҙәр күтәргән дә инде ауыл хужалығын һәм илебеҙҙе.
Ысынлап та, әллә уттай ҡыҙыу йәй айында тыуғанғамы, бик тә уңған апайыбыҙ.
Балалары ла: “Беҙ әсәйебеҙҙе бал ҡортона оҡшатабыҙ, һис тә тик тормай, бар эшкә маһир”,– тиҙәр.
“Эш инәһе тимәҫтәр, бала инәһе тейерҙәр”, – тигән халыҡ әйтеме бар, был яҡтан да бәхетле мәҡәләм геройы. Тормош иптәше Юрис Сәлим улы менән балалары Финзира һәм Азаматты тәрбиәләп үҫтереп, уларға оло тормош юлына баҫырға ярҙам итәләр. Улы Себер тарафтарында вахта ысулы менән эшләй, ҡыҙы кейәүе Зөфәр менән Йонос ауылында матур итеп донъя көтә, балалар баҡсаһында 20 йылдан ашыу эшләне. Бөгөн иһә ейән-ейәнсәрҙәр, бүләсәләр – уның йыуанысы, тормош терәге.
Ҡыҙғанысҡа ҡаршы, ағайыбыҙ иртәрәк китте беҙҙең аранан. Ире үлгәс тә, ҡәйнәһе Мәнзүмә апайҙы ла, әсәһен дә оҙаҡ йылдар ҡарап, ағинәйҙәрҙең фатихаларын алып, баҡыйлыҡҡа оҙатты еңгәбеҙ.
Әле лә Флорида апай ауылдаштарына үрнәк күрһәтерлек итеп матур донъя көтә. Өйө, ихатаһы тәртиптә, бөхтә баҡсала ишелеп емеш-еләк, йәшелсә үҫә. Урам тулы ҡош-ҡорт, һыйырын да бөтөрмәй.
Был матур йортто артабан да бәхет ҡошо ташламаһын, бәхете ғүмерлек булһын юбилярҙың.
Рәйлә Латипова,
матбуғат ветераны.