Ябай

Ябай...

Үҫтек иркәләнмәй генә,

Ябай ғына һый менән,

Алда беҙҙе затлы һыйҙар

Көтә тигән уй менән.

Ябай ҡатыҡ, ябай ҡорот,

Ябай ғына эремсек,

Май-ҡаймағы, ите-һөтө -

Булма ғына иренсәк!

Ә йәйҙәрен, еләк бешкәс,

Бына ҡайҙа хан һыйы!

Ул бөрлөгән, ул ҡарағат -

Тик өлгөр генә йыйып!

Йүкә япрағына төргән

Яңғыҙаяҡ ләззәте! -

Сейә майлау, муйыл майлау -

Уңғандарҙың ғәҙәте.

Затлы һыйы ергенәмдең,

Болон-урмандарының.

Төшөнә лә инмәй былар

Париж гурмандарының!

Ябай тимә...

Гүзәл Ситдикова