Татар әдәбияты классигы, язучы, әдәбият һәм тел галиме, публицист, тәнкыйтьче, җәмәгать һәм дәүләт эшлеклесе Галимҗан Гыйрфан улы Ибраһимов 12 мартта (иске стиль белән 28 февральдә) туган, дип саныйлар. Күп хезмәтләрдә шулай дип бирелгән.
Татар энциклопедиясендә, Г. Ибраһимов 1887 елның 28 мартында Уфа губернасы Эстәрлетамак өязе (хәзерге Башкортстан Республикасы Авыргазы районы) Солтанморат авылында дөньяга килгән, дип язылган.
Әгәр архив документларына мөрәҗәгать итсәк, әлеге даталарның берсенең дә дөреслеккә туры килмәвен күрә алабыз. БР Милли архивында сакланган Солтанморат авылы метрика дәфтәрендә түбәндәгечә язылган:
6 нчы номер. Галимҗан - 1887 елның 26 февралендә туган. Атасы - Эстәрле өязе Солтанморат авылы Гыйрфан указной имам Нурмөхәммәт улы. Анасы - Бибихәсәнә Заһидулла кызы. Солтанморат авылында үз йортында туган.
Г. Ибраһимовның туу турында таныклыгында да аның дөньга килү датасы 1887 елның 26 феврале дип күрсәтелгән.
Әлбәттә, Г. Ибраһимовның туу датасы документларда иске стиль белән язылган. Әгәр дә аны яңа стильгә күчерсәк, 10 март килеп чыга, чөнки 1887 ел кәбисә елы булмаган.
Димәк, Галимҗан Ибраһимов яңа стиль белән 1887 елның 10 мартында дөньяга килгән.
12 март дип язу, иске стильдән яңага күчергәндә, төгәл билгеләнмәгәнлектән килеп чыккан, күрәсең. Ни өчен "Татар энциклопедиясе"ндә 28 март дип язылган - анысы бөтенләй аңлашылмый.
Г. Ибраһимов 1938 елның 21 гыйнварында Казанда вафат булган. Каберенең төгәл кайда икәнлеге билгеле түгел, Архангель зиратында дип фаразлана.
Г. Ибраһимов шәҗәрәсе дә бертөрле генә түгел, ике вариантта билгеле:
1. Галимҗан - Гыйрфан - Нурмөхәммәт - Әхмәт - Хисаметдин - Ибраһим - Локман - Әхмәт.
2. Галимҗан - Гыйрфан - Нурмөхәммәт - Әхмәтҗан - Ибраһим - Арслан - Туйчы - Тамә - Иртуган.
Айдар Гайнетдинов.