Хәйбулла районында беренсе «Буйҙаҡтар һабантуйы” уҙҙы

Хәйбулла районында беренсе «Буйҙаҡтар һабантуйы” уҙҙы. Хозур тәбиғәтле Йәнтеш ауылы янында «Ҡурай” тип исемләнгән туристик база нигеҙендә ойошторолдо үҙенсәлекле сара. Был уй Хәйбулла районы башҡорттары ҡоролтайы тарафынан күптән яралған ине. Февраль айында «Айыҡ ауыл” конкурсы сиктәрендә Федоровка ауылында “Тип, йөрәгем” тип аталған таныштырыу проектының беренсе осрашыуы уҙҙы. Тәүгеһендә унлап ҡына кеше булһа, артабан киләһе осрашыуҙарҙа артҡандан арта барҙы уларҙың һаны. Һабантуйға иһә республиканың төрлө райондарынан һикһәндән ашыу 30-45 йәш арауығындағы буйҙаҡтар йыйылды. Ҡаҙан аҫып, тәмле былау бешереп, табын әҙерләп ҡаршыланы уларҙы ойоштороусылар. Программаға индерелгән төрлө спорт ярыштары, халыҡ уйындары сараға мәртәбә өҫтәне. Гармунға ҡушылып ярышып йырҙар йырланы, ритайымға баҫты йәштәр. Төн ауышҡас сара усаҡ янында гитара моңдары, күңелле дискотека менән тамамланды.

Сараны ойоштороуға Хәйбулла районы башҡорттары ҡоролтайы рәйесе Илүзә Кәримова, Йәштәр ҡоролтайы рәйесе, турбазаның хужаһы Илшат Игебаев, Хәйбулла районы хакимиәтенең йәштәр һәм спорт, мәғлүмәт бүлектәре, район мәҙәниәт йорто хеҙмәткәрҙәре, шәхси эшҡыуар, бағымсы Әхәт Байғусҡаров һәм дәртле гармун моңдары, йырҙары менән сараны биҙәүсе Гөлфиә Хәләфетдинова тос өлөш индерҙе. Йәш алып барыусылар Наҙгөл Ултыраҡова менән Рәсүл Билаловтар ҙа һабантуйҙың йәме булды.

Ҡыҫҡа ғына ваҡыт эсендә лә февраль айында башланған проект үҙенең һөҙөмтәле булыуын күрһәтте, матур парҙар барлыҡҡа килде, әле лә осрашыуҙар, йәнле аралашыуҙар дауам итә. Артабан ойоштороусылар иғтибарҙы башлыса ҙур булмаған төркөм йәштәр менән дауам итмәксе. Сөнки тәжрибә күрһәтеүенсә, аҙыраҡ булған тиклем танышыу-аралашыуҙар йәнлерәк, һөҙөмтәлерәк килеп сыға. Йәй көндәрендә йәштәрҙе тәбиғәт ҡосағында, төрлө ял урындарында осраштырыу ниәтләнә. Проект оҙон ғүмерле булһын, йәштәр ихлас танышһын, күберәк башҡорт ғаиләләләре барлыҡҡа килһен!

Фото һәм видео төшөрөү беҙҙең осрашыуҙарҙа тыйыла. Шуға күрә бәләкәй өҙөк кенә ҡуйыла.