ЗэлъашӀэрэ бзэшӀэныгъэлэжьэу

ЗэлъашӀэрэ бзэшӀэныгъэлэжьэу,

филологие шӀэныгъэхэмкӀэ докторэу, профессорэу Шъаукъо Аскэр Абубэчыр ыкъор непэ къытхэтыгъэмэ

гъэтхапэм и 5-м ыныбжь илъэс 90-рэ хъущтыгъэ.

Непэ ар къытхэмытыжьми, лъэуж дахэу чIым къытыринагъэр хэкIокIэжьырэп, игъэ­хъагъэхэм лъэпсэ пытэ адзыгъ, иIофшIагъэхэр мыкIодыжьын Iахьэу бзэшIэныгъэм ­къыфигъэнагъ. Шъаукъо Аскэр мыпшъыжьэу опсэуфэ илъэпкъ фэлэжьагъ, гъэсэныгъэм ихьасэ илъэс 50-м ехъурэ щылэжьагъ. Адыгабзэм изэгъэшIэн, иушэтын зыпылъыгъэ уахътэм IофшIэгъи 100-м ехъу къыхиутыгъ.

Ш1эныгъэлэжьыр къызыхъугъэ мафэм фэгъэхьыгъэу Гуманитар ушэтынхэмкӀэ Aдыгэ Республикэ институтэу (ГУАРИ) КIэрэщэ Тембот ыцӀэкIэ щытым бзэшӀэныгъэмкӀэ икъутамэ зэхищэгъэ Iэнэ хъураеу «Адыгэ лексикэм изэгъэшӀэн къыlэтырэ упчӀэхэр» зыфиӀорэp Хьатыгъужъыкъуае гурыт еджапIэм щырекIокIыгъ.

Мыщ фэдэ упчIэхэм язэхэфын щытегущыIагъэх:

- Адыгэ лексикэм изэхэфын Шъаукъо А. иIахьэу хилъхьагъэр;

- Адыгэ лексикографиер;

- НэмыкIыбзэхэм къахэкIыгъэ гущыIэхэм Шъаукъо А. къариIолIагъэр;

- Профессорэу Шъаукъо А. лIэшIэгъум икIэлэегъадж.

Мы упчIэхэмкIэ псалъэ къашIынэу гущыIэ аратыгъ ГУАРИ-м бзэшӀэныгъэмкӀэ икъутамэ щылажьэхэрэу — Анцокъо Сурэт, Тыгъужъ Гощсым, Тэу Нуриет, Атэжьахьэ Сэйхьат.

Филологие шӀэныгъэхэмкӀэ кандидатэу, Дзюзджэ университетым иIофышIэу Шъхьалэхъо Сусанэ видео къэгъэлъэгъон шIыкIэм тетэу Iэнэ хъураем иIофшIэн хэлажьэхэрэм шIуфэс фабэ къарихыгъ.

Филологие шӀэныгъэхэмкIэ докторэу,

ГУАРИ-м икъутамэ иапшъэрэ шӀэныгъэлэжьэу, шӀэныгъэхэмкӀэ Адыгэ черкес) дунэе академием иакадемикэу

Бырсыр Батырбый шIукIэ ыгу къэкIыжьыгъ.

ГукъэкIыжь фабэхэмкIэ бзэшӀэныгъэлэжьым игугъу къэзышIыгъэхэм ащыщ филологие шӀэныгъэхэмкӀэ кандидатэу Сихъу СултIан.

Доклад къышIыгъ Хьакурынэхьэблэ гурыт еджапIэм адыгабзэмрэ ыкIи литературэмрэкIэ икӀэлэегъаджэу Гъыщ Нахьмэт.

#Шовгеновскийрайон #новости #администрация