Чаго толькі не сабраў у сабе, як у каштоўны куфэрак, гэты маршрут! Знакамітыя замкі, храмы розных канфесій, часткова адрэстаўраваныя старадаўнія сядзібы, манастыры і нават фамільны магільны склеп знакамітага роду Умястоўскіх. А ў «маленькім Іерусаліме» І’ўі наведаем найстарэйшую дзеючую мячэць Беларусі!
* Экскурсія праводзіцца на беларускай мове.
Праграма экскурсійнага тура "Там б'е крылом гісторыя сама"
Іўе, якое прыпала да Гродзенскай шашы, часам называюць "маленькім Іерусалімам". Там размяшчаюцца найстарэйшая дзеючая мячэць Беларусі і адзіны музей нацыянальных культур. Наведванне мячэці дазволіць вам шмат даведацца пра традыцыі і побыт татараў у Беларусі. Тут на былой рыначнай плошчы пастаўлены ўнікальны помнік "Адзінства чатырох канфесій": каталіцызм, юдаізм, праваслаўе і іслам. І нібы ў працяг гэтай тэмы верацярпімасці ля сцен касцёла св. Пятра і Паўла 1491 г. пабудовы вы даведаецеся пра легендарную Акадэмію арыян, якая была адным з цэнтраў адукацыі ў Вялікім Княстве Літоўскім у XVI ст. Статуя Хрыста ля Іўеўскага касцёла мімаволі асацыіруецца са знакамітай скульптурай у Рыа-дэ-Жанейра.
На змену Іўю прыходзіць былое мястэчка Суботнікі, вядомае з ХVII ст. Чырвонацагляны касцёл Св. Уладзіслава (1904) здалёк зачароўвае сваёй грацыёзнай сілуэтнай графікай. Узводзілі святыню Уладзіслаў і Яніна Умястоўскія. У ім і пахавалі фундатара, а затым у магільны склеп былі ўнесены астанкі яго даўно памерлых сваякоў. Пра гэта паведамляе мемарыяльная дошка, усталяваная ў 1931 годзе ў фамільным магільным склепе Умястоўскіх у крыпце храма: дзівосная чысціня, бліскучыя паліраванымі гранямі самавітыя мармуровыя пліты з імёнамі і датамі...
З графамі Умястоўскімі цесна звязана і былы маёнтак Жамыслаўль. Тутэйшы палац з бельведэрам і карынфскімі порцікамі па абодва бакі ўяўляе сабой паменшаную копію каралеўскага "Палаца-на-вадзе", выбудаванага для апошняга манарха Рэчы Паспалітай Станіслава Аўгуста Панятоўскага ў Лазенках пад Варшавай. Лепка на столях і мазаічная падлога збліжалі жамыслаўскі палац з варшаўскім, а багата прыбраныя інтэр'еры сведчылі аб выдатным гусце яго ўладальнікаў. Вакол сядзібы, якая цяпер чакае рэстаўратараў, захаваліся шматлікія гаспадарчыя пабудовы. А потым на маршруце нас чакае смачны абед.
З Жамыслаўля дарога прыводзіць нас у Трабы. Яны вядомы з ХV стагоддзя, калі князь Трабус пабудаваў тут замак. Петра-Паўлаўская царква ў Трабах была складзена з дрэва ў 1784 годзе і істотна перароблена на мяжы ХIX-XX стст. У тутэйшага касцёла Нараджэння Дзевы Марыі (1905) вельмі маляўнічы сілуэт. Яго магутныя трох'ярусныя вежы, перспектыўны партал і франтон-шчыт уверсе; карагод контрфорсаў пакідаюць у памяці яркі вобраз нейкага гатычнага "містыцызму".
Гальшаны ў мінулым былі прыватнаўласніцкім паселішчам князёў Гальшанскіх (Альшанскіх). З іх роду паходзіла Соф'я Гальшанская — жонка караля Уладзіслава Ягайлы, якая стала родапачынальніцай дынастыі Ягелонаў і якой тут пастаўлены помнік. З XVI ст. мястэчкам валодаў род князёў Сапегаў. У 1618 годзе Павел Стэфан Сапега пачаў будаўніцтва комплексу кляштара францысканцаў. Манастырскія пабудовы выкарыстоўваюцца і цяпер як дзейны касцёл. А збудаваны палацава-замкавы ансамбль роду Сапегаў — Гальшанскі замак — дайшоў да нас у маляўнічых руінах. Гальшанскі замак зараз рэстаўруецца, ужо гатова адна з веж, частка сцен. Наведванне музея ў вежы замка. А з агляднай пляцоўкі на вежы замка — цудоўны від на наваколлі... У Гальшанах таксама ацалела характэрная местачковая забудова XIX-XX стст., што надае цяперашняму аграгарадку асаблівае зачараванне.
Старая дарога з Гальшан вядзе ў Баруны. З 1691 г. жыццё гэтага былога мястэчка было моцна звязана з манастыром, які стаў адным з духоўных цэнтраў уніяцтва ў Беларусі. У яго сценах знаходзіцца дагэтуль цудатворны абраз Божай Маці Барунскай, Суцяшальніцы ўсіх засмучаных. Святыню адрозніваюць вытанчанасць формаў "віленскага" барока.
І нарэшце, Крэва. Аграгарадок (раней — вялікакняжацкі маёнтак) вядомы з XIV ст., калі тут быў пабудаваны замак, у якім у 1385 годзе была заключана знакамітая ў гісторыі Крэўская унія. Яна паклала пачатак аб'яднанню Вялікага Княства Літоўскага і Каралеўства Польскага. Маляўнічыя руіны старажытнага замка — адна з найбольш яркіх славутасцяў Беларусі. Крэўскі замак у цяперашні час у працэсе рэканструкцыі, адноўлена адна сцяна. У 1387 годзе ў Крэве з'яўляецца драўляны касцёл — на яго месцы зараз можна ўбачыць пабудаваны ў 1990-х гадах каменны храм Праабражэння Гасподняга. Насупраць яго ўздымае да неба сваю шатровую званіцу праваслаўная царква ў імя Св. Аляксандра Неўскага (1854).
Падрабязней аб экскурсіі тут
А вы былі на гэтай экскурсіі? Пішыце вашыя водгукі ў каментарах. Будзем вам удзячныя!
Экскурсии по Беларуси:
Туристско-информационный центр "Планета Беларусь", тел. в Минске +375295000180, +375445000225 (Вайбер, Телеграм, Вотсап).
Еще экскурсии:
Еще больше экскурсий по этой ссылке