Рәсәйҙә ғаиләләрҙең яҡынса 20 проценты балаһыҙлыҡ мәсьәләһенә тап була. Шундай бәләгә юлыҡҡанда, айырылышыуҙан ҡурҡһағыҙ, мөхәббәтегеҙҙе һәм ғаиләгеҙҙе һаҡлап ҡалыу өсөн түбәндәге кәңәштәрҙе тәҡдим итәбеҙ:
* Психологка мөрәжәғәт итегеҙ, был ғаилә проблемаларын ентекләберәк аңларға һәм дөрөҫ ҡарар табырға ярҙам итәсәк.
* Күберәк ваҡытығыҙҙы бергә үткәрегеҙ.
* Икегеҙ өсөн дә ҡыҙыҡлы булған яңы мауығыуҙар табығыҙ.
* Бала табыу мәсьәләһен икенсе планға күсерегеҙ, йылы мөнәсәбәттәрҙе кире ҡайтарығыҙ.
* Бер-берегеҙҙең уй-фекерҙәре менән ҡыҙыҡһынығыҙ, проблемаларҙы бергәләп тикшерегеҙ.
* Енси мөнәсәбәт – ул бала табыу ысулы ғына түгел, ә парҙа яҡынлыҡ һәм аралашыуҙың бер өлөшө лә. Был функцияларын юғалтҡанда мөнәсәбәттәр тарҡала башлай. Ирҙәр бындай бәйләнештәр етмәүгә һиҙгер булғанлыҡтан, ҡатын-ҡыҙға ошоно һәр саҡ иҫтә тоторға кәрәк. Ҡайһы берҙә хужабикә һәм буласаҡ әсә генә түгел, ирең өсөн һөйәркә лә булырға кәрәк.
* Балаға уҙа алмау хаҡында йыш уйларға ярамай.
* Сәйәхәт – ул ыңғай кәйеф алыу, ял итеү һәм бер-берегеҙ менән бергә булыу өсөн бик яҡшы ысул.
* Бергәләп бала табыуҙың альтернатив алымдары (ЭКО, суррогат әсәлек) темаһын тикшерегеҙ. Бындай варианттар икегеҙ өсөн дә яраҡлы булырмы, бәлки, был һеҙҙең аныҡ хәлдән сығыу юлылыр.
* Мөнәсәбәттәрҙе өҙөү – ул сиктән тыш сара.
Рүзилә ИҪӘНБАЕВА
