УЙЛАНДЫРА ЛА, ҺОҠЛАНДЫРА ЛА

Май аҙаҡтарында ғына Өфөлә өс көн буйына шаулап-гөрләп «Китап-байрам» халыҡ-ара китап йәрминкәһе үтте. Ошо сара асылып ҡына торған мәлдә, уға йәм өҫтәп, ҡулыма яңы ғына «мейестән сыҡҡан» «Ҡояшҡа табынам» исемле шиғырҙар китабы килеп эләкте. Уның авторы – беҙҙең талантлы яҡташыбыҙ, Рәсәй Федерацияһының һәм Башҡортостан Республикаһының Яҙыусылар союздары ағзаһы, райондың «Дим» әҙәби берекмәһе етәксеһе Миңзәлә Хәлилова.

Йөҙгә яҡын биттән торған был баҫма әллә ни ҙур ҙа түгел – кеҫәңә һалып, гел генә яныңда йөрөтөрлөк ыҡсым ғына. Ә бына йөкмәткеһе, күтәрелгән темалар киңлеге тотош бер йыһан дәүмәлендә. Йыйынтыҡҡа баш һүҙ яҙған М. Аҡмулла исе­мендәге Башҡорт дәүләт педагогия университеты доценты, Рәсәйҙең һәм Баш­ҡортостандың Яҙыусылар союздары ағзаһы, филология фәндәре кандидаты Зәки Әлибаев һүҙҙәре менән әйтһәк, «автор һүҙ ҡәҙерен яҡшы тоя, һәр образға иғтибарлы. Уның шиғриә­тенең тематикаһы күп төрлө, жанр­ҙарға бай».
Ысынлап та, был китапта тыуған яҡ­ҡа һоҡланыу, яҡындарына һөйөү той­ғолары менән һуғарылған лирик ши­ғыр­ҙар менән бер рәттән тормош асылы хаҡында фәлсәфәүи уйла­ныуҙар, бөгөнгө көндә бер кемде лә битараф ҡалдырмаған махсус хәрби операцияға бәйле кисерештәр сағы­лыш тапҡан әҫәрҙәр ҙә урын алған. Ир ҡатыны, ике ул әсәһе, биш ейән-ейән­сәр өләсәһе булған Миңзәлә Ва­сил ҡыҙының «Һуғыш бөттө!» тиеп һө­йөнсөләп, йөрәгемә йәндәр өрө­гөҙ!» тигән юлдары һәр әсәнең, аяҙ күк аҫтында тыныс йәшәргә теләгән һәр кешенең күңеленә үтеп инә, ирек­һеҙҙән күҙҙәрҙе дымландыра.
Бәләкәй генә баҫмала автор­ҙың төрлө жанрҙарға мөрәжәғәт итеүен дә күрергә була – нескә хисле, йә булмаһа, еңелсә юмор менән ижад ителгән шиғырҙар менән йәнәшә уйҙарға һалырлыҡ тәрән мәғәнәле, фәһемле «Әсә нәсихәте» исемле ҡоба­йыр һәм «Төйлөгән» поэмаһы ла урын алған.
Миңзәлә Хәлилованың ҡайһы бер лирик әҫәрҙәре йыр рәүешендә лә халыҡ араһында таралған. Мәҫәлән, ошо китапҡа ингән «Әсәйем сейә­ләре»нә көйҙө Гөлүзә Буранбаева ижад иткән, ә «Аҡ елкән» һәм «Өҙөлгән сәскәләр» шиғырҙарына музыканы Факи­һа Таштимерова яҙған.
«Дим» әҙәби берекмәһе ағзала­ры­ның берлектәге биш йыйынтығында донъя күргән әҫәрҙәренән тыш, Миңзәлә Васил ҡыҙы – дүрт шәхси китап авторы. 2001 йылда «Аҡ елкән» (шиғырҙар), 2017-лә «Төштәге осрашыу» (хикәйәләр), 2023-тә кескәйҙәр өсөн башҡорт, рус һәм инглиз тел­дә­рендә «Ҡояш балалары» исемле әкиәт китабы нәшер ителде. Дүр­тен­сеһе иһә, юғарыла телгә алынған, яңы ғына «табанан төшкән» шиғри йы­йынтыҡ.
Миңзәләгә өлгәшелгәндәр менән ҡәнәғәтләнеп, ҡул ҡаушырып ултырыу хас түгел. Яҙа башлаған эштәре лә, әлегә башында ғына йөрөткән яңы темалары ла байтаҡ. Шуға күрә ижад ҡомарының һүнмәүен, илһам ҡошоноң тағы ла киңерәк офоҡтарға сығыуын теләп, унан яңынан-яңы ҡаҙаныштар көтөп ҡалабыҙ.

Гөлфирә ҒӘСКӘРОВА,
Башҡортостандың
Яҙыусылар союзы һәм «Дим» әҙәби берекмәһе ағзаһы.