Казан театр училищесы - Казанда урнашкан Татарстан Республикасының урта һөнәри белем бирү дәүләт автоном мәгариф учреждениесе. Россия Федерациясенең иң борынгы сәнгать уку йортларының берсе.
Татарстан Республикасы Министрлар Кабинетының 29.03.2024 номерлы карары белән СССРның халык артисты Шәүкәт Биктимеров исеме бирелде.
Татглавпроферның 1922 елның 26 сентябрендәге карары нигезендә Татар театр техникумы төзелә.
Элегрәк, 1906 елның 22 декабрендә, беренче тапкыр татар телендә спектакль куела. Бу дата Галиәсгар Камал исемендәге Татар театрының туган көне булып санала. Бу елларда татар театрының аякка басуына артист һәм режиссер Ильяс Кудашев-Ашказарский, күренекле татар драматурглары Галиәсгар Камал, Кәрим Тинчурин, актер һәм режиссер Зәйни Солтанов йогынты ясады, соңыннан ул Татар театр техникумы мөдире булды.
Техникумны беренче чыгарылышта Хәким Сәлимҗанов, Галина Кайбицкая, Риза Ишморат, Галия Булатова тәмамлаганнар, алар техникумны тәмамлаган соң да театр культурасын үстерүгә шактый йогынты ясыйлар.
1927 елның ноябрендә ике техникум - сәнгать һәм театр техникумы бергә кушылып, Казан берләштерелгән сәнгать-театр техникумы исемен ала.
1930-1931 елда сәнгать-театр техникумы Көнчыгыш музыка техникумы белән берләшә һәм Татар сәнгать техникумы буларак яши башлый. 1941 елга кадәр техникум башкала һәм республика өчен югары профессиональ кадрлар әзерләгән, Бөек Ватан сугышы елларында техникум ябылган.
ТАССР Совнаркомы карары нигезендә 1944 елның 1 мартында яңадан техникум ачыла. 1945/46 уку еллары башында училищеда 17 укытучы була, шуларның 6 сы исем һәм гыйльми дәрәҗә алган. 1952 елның 13 июнендә СССР Министрлар Советы карары нигезендә техникум ябыла. 10 ел дәвамында ТАССРның Мәдәният министрлыгына әлеге уку йортының эшен яңарту өчен зур тырышлык куярга туры килә.
1962 елның 12 маенда техникум тарихында яңа эра башлана, аның базасында бүгенге көнгә кадәр эшли торган Казан театр училищесы төзелә. Театр училищесы җитәкчесе итеп Щепкин театр училищесын тәмамлаган Дамир Бәдретдинов билгеләнә.
1963-1964 елларда училищега Гоголь урамындагы ветеринария шифаханәсенең икенче катын биргәннәр. Училище директоры Арнольд Львович Шапиро булды, нәкъ менә аның тырышлыгы белән хәзерге ике бина тулысынча театр көллиятенеке булып тора.
1964 елда училищеда рәссам-бутафорлар бүлеге ачыла, һәм 1968 елда беренче чыгарылыш була.
Казан театр училищесын тәмамлаучылар, Татарстанның, Россия Федерациясенең һәм якын чит илләрнең шәһәрләрендә төрле театрлар сәхнәләрендә хезмәт итәләр.