Әй, Сабантуй, Сабантуй!

Гасырлардан гасырларга күчеп, безнең көннәргә кадәр килеп җитсә дә, матурлыгын югалтмаган бәйрәм ул – Сабантуй. Туганнар, дуслар очраша торган мәйдан ул. Нәкъ менә Сабантуй барлык милли уеннарны, көрәш, ат чабышларын яратучыларны бер мәйданга туплый.

Сабантуй мәйданы капкасы янында кунакларны гармунчылар каршы алды. Гармун көйләрен тыңлап кунаклар “Вакыт елгасы” күргәзмә мәйданына үтте.

Быел “Сабантуй бизәкләре” дип аталган фотокүргәзмә дә эшләде. Анда 1970-2023 елларда узган Сабантуй күренешләре урын алган. Фотоларга карап күпләр истәлек-хатирәләрен барлады.

Татар ихатасының капка төбендә татар, рус, керәшен һәм мари кызлары каршы алды. Алар кунакларны сәламләп, милли ризыклар белән сыйлады.

 Сабантуйның тантаналы өлешендә 500 райондашыбыз катнашты. Театральләштерелгән тамашага гаиләне олылау, әти-әнигә хөрмәт, җир-анага мәдхия, туган илгә хөрмәт мәгънәсе салынган иде.

Татарстан Республикасы Рәисе Рөстәм Миңнехановның котлавын якташыбыз, “Татмедиа” Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев җиткерде.

Гадәттәгечә, зур сәхнәдә дәүләт бүләге алучылар, кыр уңганнары, мәктәп алдынгылары хөрмәтләнде. “Намус” агрофирмасы механизаторы Мөнәвир Кәримов “Кыр батыры” исеменә лаек булды һәм тәкә белән бүләкләнде. Мәктәп укучылары арасында “Мөслим егете” һәм “Мөслим кызы”, “Ел укучысы” титулына лаеклылар билгеле булды. “Мөслим егете” титулын Мөслим лицееның 9 сыйныф укучысы Искәндәр Зарипов алды. “Мөслим кызы” исеме Г.Тукай исемендәге Мөслим урта мәктәбенең 9 сыйныф укучысы Зәринә Нуретдиновага бирелде. “Ел укучысы” исеменә Мөслим лицееның 10 сыйныф укучысы Мәдинә Морзаханова лаек булды.

Авыш һәм туры баганага менү, капчык киеп һәм йомырка салынган кашык кабып йөгерү, көянтә-чиләк белән су ташу, йон эрләү, чүлмәк вату, капчык сугышы, гер күтәрү, кул көрәше һәм башка уеннарда халык бик теләп катнашты. балалар аерым мәйданчыкта көч сынашты.

Көрәш балалар һәм өлкәннәр арасында узды. Бәйгедә биш дистәдән артык көрәшче катнашты. Бертуган Айнур һәм Илдар Сәетгалиевләр (Илнар быел көрәшкә кермәде) өлкәннәр мәйданында көрәшсә, аларның уллары балалар көрәшендә җиңү яулый. Быелгы Сабантуйда абсолют батыр исемен Илдар Сәетгалиев алды.

Сабантуйны икенче ел рәттән “Болгар” радиосы алып баручылары Эльвира Вилдан, Рөстәм Гайзуллин һәм Илнар Йосыпов алып барды.

Уеннар барганда үзәк сәхнә дә буш тормады. Район үзешчәннәренең дәртле җырлары, фольклор ансамбльләр чыгышы бәйрәмгә ямь бирде. “Казан” бию ансамбле һәм Казан шәһәре филармониясе артистларының җыр-биюләрен дә тамашачылар яратып кабул итте.

Фәридә Гайнетдинова репортажы.

Римма Афзалова фотолары: https://vk.com/musluminform?z=album-78072920_303096443