2024 йылдың икенсе ярты йыллығына яҙылыу кампанияһы дауам итә һәм районка үҙенең уҡыусыларын ҡыуандырыуҙан туҡтамай. Дәүләкәндә йәшәүсе Виктор Панков менән Рәфис Сафин «Асылыкүл» һәм «Балҡантау» гәзиттәренә яҙылып, редакциянан матур бүләктәр алды.
Виктор Панков: «Гәзиттән бүләк отоу минең өсөн, әлбиттә, көтөлмәгән хәл булды. Быйыл яҙылыу тураһында квитанциямды беренсе тапҡыр килтерҙем бит. Етмәһә, бөтөнләй осраҡлы ғына: редакция эргәһенән үтеп барғанда, башыма ҡапыл ғына, квитанцияны индереп сығайым әле тигән уй килде. Гәзитте 30 йылдан ашыу алдырам, әммә конкурста бер ҡасан да ҡатнашып ҡараманым. Редакцияның үҙенең уҡыусыларына ошондай иғтибар күрһәтеүе күңелде күтәреп ебәрҙе, ҙур рәхмәт. Өҫтәүенә районка биттәрендә хәҙер минең фотомды ла баҫтыралар, бөтә туғандарым һәм таныштарым күрәсәк, тимәк, минең өсөн бер юлы ике сюрприз булды.
Дөрөҫөн әйткәндә, гәзиттә яратҡан рубрикаларым юҡ. Мин барыһын да уҡыйым, бөтә темалар ҙа оҡшай: саралар тураһында ла, кешеләр хаҡында ла - барыһы ла ҡыҙыҡлы».
Рәфис Сафин: «Был юлы мин «Балҡантау»ҙы бер йылға яҙҙырҙым, шулай уңайлыраҡ. Район гәзите беҙҙең өйҙә һәр ваҡыт, бала сағымдан уҡ булды. Элек атай-әсәйем яҙыла ине, хәҙер инде мин дә алдырам. Башҡаса булырға мөмкин дә түгел. Район яңылыҡтарын ҡайҙан беләһең? Ил яңылыҡтарын телевизорҙан ҡарарға мөмкин, ә беҙҙең, урындағыларын - гәзиттән. Мин төрлө нәмәләр яҙырға мөмкин булған Интернетҡа түгел, ә рәсми мәғлүмәт сығанаҡтарына ышанам. Хәҙер гәзиттә көнүҙәк мәғлүмәттәрҙең күп булыуын, яҡшы тип иҫәпләйем. Махсус хәрби операцияла ҡатнашыусы егеттәребеҙ, улар өсөн ойошторолған ярҙам тураһында, мәҫәлән. Мәсеткә лә йыш ҡына төрлө яңылыҡтары: шатлыҡтары һәм ҡайғылары менән хәрбиҙәрҙең туғандары, йәштәр килә. Уларға ярҙам итеү, һәйбәт нәсихәт биреү, дөрөҫ хәбәрҙәр еткереү мөһим. Ә гәзиттә бындай мәғлүмәттәр бар.
Районканан бүләкте мин беренсе тапҡыр алдым, әйтергә кәрәк, ул бик файҙалы, хужалыҡта һәр ваҡыт кәрәк буласаҡ. Шәхси йортта йәшәйем, баҡсам бар, шуға унда эшләгәндә гәзитте яҡшы һүҙ менән иҫкә аласаҡмын».