Президентлыҡҡа кандидаттар өсөн тауыш биреү көндәрендә Дәүләкән районының барлыҡ һайлау участкаларында «Бик тәмле!» милли аш-һыуҙар фестивале һәм халыҡ өсөн башҡа бик күп ҡыҙыҡлы саралар ойошторолдо. Мәкәштә лә һайлау көндәре байрамса һәм күңелле үтте.
Был көндәрҙә беҙ үҙебеҙҙең киләсәгебеҙҙе, илебеҙҙең яҙмышын һайлағаныбыҙҙы аңлап, ауыл халҡының күпселеге тауыш бирергә килде. Мәкәш ауыл мәҙәниәт йорто бинаһында урынлашҡан һайлау участкаһына килеүселәр өсөн ҡыҙыҡлы саралар үткәрелде. Иртәнән үк тантаналы көйҙәр яңғырап торҙо. Халыҡ иғтибарына сағыу итеп биҙәлгән күргәҙмәләр, мәғлүмәт стендтары тәҡдим ителде. Теләге булғандар бильярд, теннис, шахмат һәм шашка уйнай алды.
Ауылдың күп функциялы клубы хеҙмәткәрҙәре сарала ҡатнашыусылар менән берлектә бай табын әҙерләне, унда ауыл биләмәһендә йәшәгән төрлө халыҡтарҙың милли ризыҡтары тәҡдим ителде. Иң түрҙә самауыр урын алғайны. Әлбиттә, клуб фойеһында әҙерләнгән эҫе ҡоймаҡтар өҫтәлдең төп биҙәге булды. Бөтәһен дә ҡайнар сәй менән һыйланылар.
Ошонда уҡ конкурстар, ярыштар ойошторолдо. Команда капитандары Азат Ғәниев, Рәүеф Моратшин, хеҙмәт ветерандары Нәсимә һәм Нәфҡәт Заһитовтар, Розалиә Абзалова һәм Рәйзә Әхмәтрәхимова, Айгөл Зарипова, Венера Батталова, Фәһимә Ситдиҡова, Зәриә Нафиҡова еңеү өсөн ныҡышмалы көрәште. Спорт ярыштары уйын-көлкө менән үрелеп барҙы. Хеҙмәт ветераны Рәйфә Нурғәлиева һәм һайлау комиссияһы ағзаһы Гөлсәсәк Сәлимгәрәева матур йырҙар башҡарҙы. Илфат Мәжитов һәм Фәйез Камалетдинов үҙ командаларында иң оҫтаһы һәм иң етеҙе тип танылды.
Рәйзә Әхмәтрәхимова.