«Беҙҙең таянысыбыҙ һәм яҡлаусыбыҙ»

Донъяла көтөүҙән дә ауырыраҡ нимә булырға мөмкин? Айырыуса хәҙер, махсус операция ваҡытында. Улдарының, ирҙәренең ҡайҙа һәм нисек булыуҙарын, бәйләнешкә ҡасан сығасаҡтарын, бөтөнләй сығырҙармы-юҡмы икәнлеген дә белмәйенсә көтөргә лә көтөргә.... Бөгөнгө көндә махсус операцияла ҡатнашыусы яугирҙең ҡатыны, әсәһе булыуҙан да ҡыйыныраҡ нимә юҡ. Әммә әлеге мәлдә тап ошо гүзәл зат вәкилдәре ваҡытлыса айырылышыуҙы сабыр ғына үткәрә, ғаиләләре хаҡында бөтә хәстәрлекте үҙ өҫтөнә ала, балалар тәрбиәләй, эшләй һәм ҡәҙерле кешеһенән хәбәр көтөп, уның тураһында уйлағанда йөрәгенең нисек борсолғанын бер кемгә лә күрһәтмәҫкә тырыша. «Улар өсөн иң мөһиме – беҙҙең ярҙамды тойоу», – ти. Дәүләкән ҡалаһында йәшәүсе Регина А. Уның ире әлеге мәлдә яу ҡырында.

«Ирем районыбыҙҙың бер ауылында күп балалы ғаиләлә тыуып үҫкән, - тип һөйләй Регина. - Дәүләкән ҡалаһының мәктәп-интернатында (лицей-интернат) уҡый. Һигеҙ класты тамамлағас, автотранспорт техникумына инә. Артабан уҡыу комбинатында автомеханик һөнәрен үҙләштерә. 1996 йылда Ҡо­раллы Көстәр сафтарына саҡы­рыла, Чечнялағы ҡыҙыу нөктәләрҙә хеҙмәт итә, хәрби наградалары бар. Демобилизациянан һуң тыуған яҡтарына ҡайтып, ҡала предприятиеларының береһенә эшкә урынлаша».
Ирле-ҡатынлы А.-лар 2005 йылда ғаилә ҡора. Йәштәр ике йыл кейәүҙең ата-әсәһе менән бергә йәшәй, һуңынан үҙҙәренең йортон төҙөй. Бер-бер артлы ҡыҙҙары һәм улдары тыуа, улар бөгөнгө көндә 17 һәм 16 йәштә. Бер аҙҙан ғаилә Дәүләкәнгә күсергә ҡарар итә, бында инде хәҙер ун өс йыл ғүмер кисерә. Ғаилә башлығы Алыҫ Себер ҡалаларының береһендә юл төҙөү ойошмаһына вахта ысулы менән эшкә урынлаша, унда алғы һыҙыҡҡа киткәнгә тиклем хеҙмәт һала.
«Ирем махсус хәрби операция зонаһына 2022 йылдың октябрендә китте, - тип дауам итә Регина А.- Был хаҡ­та беребеҙгә лә бер һүҙ ҙә әйтмәне. Әйберҙәрен йыйғанда, ашы­ғыс рәүештә эшкә саҡырҙылар тине. Беҙ ышандыҡ. Ә алғы һыҙыҡҡа китеүе тураһында һуңынан, телефон аша шылтыратып һөйләшкәндә генә белгертте. Был минең өсөн шок булды, бер һүҙ ҙә әйтә алманым. Ваҡыт үтеү менән бер аҙ тыныслана төштөм, хәҙер инде яҡшыға өмөтләнергә һәм көтөргә генә ҡала. Башҡа яугирҙәрҙең яҡындары кеүек үк, мин дә осрашыу буласаҡ көндәрҙе һанайым һәм күңелемдә ниндәй тойғолар ҡайна­ғанын һүҙ менән генә аңлата алмайым. Һәр иртәне тормош иптәшем тураһындағы уйҙар менән күҙҙәремде асам, уның шылтыратыуын көтәм. Тик был мөмкинлек «таҫма артында»ғы хәлдәр торошона бәйле шул. Һәр ваҡыт ирем үҙе шылтырата, ә мин сабыр ғына ошо минуттарҙы көтәм.
Аталары менән ирем өйҙә юҡта, ғаиләбеҙҙә «тыл тотабыҙ» һәм көнкүреш проблемаларын үҙебеҙ хәл итәбеҙ. Уҡыу, эш, өй мәшәҡәттәре - барыһы ла ғәҙәттәгесә, тик ҡәҙерле кешебеҙ генә эргәбеҙҙә юҡ. Уның өсөн борсолоу тормошто бер аҙ ҡатмарлаштыра, әлбиттә. Аталары менән ғорурланған һәм уның ҡайтыуын түҙемһеҙлек менән көткән балаларым, яратҡан эшем бер аҙ онотолорға ярҙам итә, ә унан килгән, барыһы ла яҡшы буласаҡ тигән ҡыҫҡа, әммә шул тиклем мөһим һәм көтөп алынған хәбәрҙәр ышаныс һәм көс өҫтәй».
Тыуған яғынан киткәндән һуң А. тәүге ике айҙа Пенза ҡалаһында хәрби әҙерлек үтә. Регина унда тормош иптәше эргәһенә барып ҡайта. Был осрашыу ваҡытында ире үҙенең ҡылығын дөрөҫ тип иҫәпләүе, унда аҡса өсөн бармауы, ил өсөн ауыр ваҡытта ситтә, башҡалар артында ҡасып ҡалһа, Ватан һаҡсыларының күҙҙәренә тура ҡарай алмаясағы, иң мөһиме - атаһы өсөн улы оялмаһын тип, уға өлгө булырға тейешлеге тураһында белдерә.
«Әгәр тормош иптәшем ил мәнфәғәттәрен яҡларға бармаһа, ваҡыт үтеү менән, бәлки, уны хөрмәт итеүҙән дә туҡтар инем, - ти Регина. – Ә мин уның менән ғорурланам! Бергә йәшәгән йылдарҙа ғаиләбеҙҙә төрлө саҡтар булды, әлбиттә, әммә тап ошо йыл ярым айырым йәшәгән ваҡыт бер-беребеҙгә ни тиклем ҡәҙерле булыуыбыҙҙы күрһәтте. Яҡыныңды бөтөнләйгә юғалтырға мөмкин икәнлеген аңлағандан һуң, уны көслөрәк баһалай башлайһың. Был йыл ярым эсендә ул ике тапҡыр отпускыға ҡайтты: беренсе тапҡыр – былтыр йәй, икенсе тапҡыр декабрҙә – ауыр яраланғандан һуң реабилитацияға. Ул һөйләмәһә лә, унда барыһына ла ни тиклем ауыр һәм ҡатмарлы икәнлеген аңлайым, шуға һөйләшкәндә, ҡулымдан килгәнсә ҡеүәтләргә, уның хәрби рухын нығытырға тырышам. Беҙҙең ярҙамыбыҙ һәм Ватанға тоғролоҡ анты биргән ирҙәребеҙҙең үҙ бурыстарын намыҫ менән үтәйәсәгенә ышанысыбыҙ – яугирҙәр өсөн иң мөһиме».
Лилиә Ғайсина.