Кеше ауырлыҡтар килгәндә һынала. Ҡунаҡ булышҡанда ғына түгел, оло ҡайғыла ла бергә булыу мөһим.
Бөгөнгө көндәрҙә ауылдаштарыбыҙҙың бергә тупланыуы, бер-береһенә иғтибарлы, изгелекле булыуы менән ҡыуандыра. Ауылыбыҙға ауыр һынау килгәндә, тотош ауылдаштар дәррәү күтәрелеп ҙур эш башҡарҙы - кемдер ҡарҙан юл таҙартыу менән булды, кемдер аят табынына ит һәм төрлө тәм-том әҙерләп алып килде, хатта матди ярҙам йыйыуға ла битараф ҡалған кеше булманы. Ошо күренештәрҙе күреп, ишетеп, бына ҡайҙа ул берҙәмлек тойғоһо йәшәй, тип бер ҡыуанһам, ә икенсе яҡтан, бөтәһен дә ойоштороп, ошо ваҡиғалар уртаһында ҡайнап йәшәгән төрлө йәштәге ауылым ханымдары миндә ғорурлыҡ хистәрен уятты.
Айырыуса һүҙем нәҡ фотоһүрәттәге ҡатын-ҡыҙҙар тураһында. Уларҙың үҙ тормош мәшәҡәттәренә ҡарамаҫтан берҙәм, әүҙем булыуы һоҡландыра. Ауылымдың әрһеҙ инәй-апайҙары, еңгәй-килендәр! Гелән шулай игелекле, ярҙамсыл булып ҡалығыҙ. Һеҙ ауылымдың йәме һәм ҡото. Һеҙ булғанда был донъяла йәшәүе йәнле һәм йәмле. Һәр ваҡыт шулай булып ҡалығыҙ! Һеҙҙең барығыҙға ла иҫәнлек-һаулыҡ, ғаилә именлеге, алдағы киләсәктә тик шатлыҡ-ҡыуаныстарҙа теп-теүәл генә осрашырға яҙһын тип теләйем.
Автор:Эльза Вәлиева