Әбүбәкер ауылы халҡы Бөтә донъя башҡорттары ҡоролтайы президиумының ағзаһы Сәлиә Мырҙабаева һәм йәмәғәт ойошмаһының хеҙмәткәре, яҡташыбыҙ Альбина Әфләтүнованы хөрмәтләп ҡаршы алды. Мәртәбәле ҡунаҡтар “Айыҡ ауыл-2022” республика бәйгеһендә ҡатнашып, 2-се урын яулауға өлгәшкән әбүбәкерҙәрҙең уңыштары менән танышты, ауыл оҫталарының күргәҙмәләрен һәм дәртле йыр-бейеүҙәрен кинәнеп ҡараны, һуңынан ауыл китапханаһына финанс грамоталығы буйынса китаптар тапшырҙы. Әйткәндәй, һуңғыһы «Башҡортостан Республикаһының финанс үҙәге» ойошмаһы менән «Айыҡ ауыл» проектының хеҙмәттәшлек итә башлауы һөҙөмтәһендә бойомға ашырыла.
Эйе, әбүбәкерҙәр электән берҙәмлеге, уңғанлығы, тырышлығы менән айырылып тора. Ауылды төҙөкләндереү өмәләрендә, төрлө мәҙәни сараларҙа, дини байрамдарҙа, спорт ярыштарында ла улар бергә дәррәү ҡатнашып, әүҙемлеге менән барыһында ла һоҡланыу уята. Бөгөнгө көндә ил һағында торған, махсус хәрби операцияла ҡатнашҡан яҡташтарыбыҙҙы ла әбүбәкерҙәр онотмайҙар, ир-егеттәргә даими рәүештә гуманитар ярҙам йыйып, маскировкалау селтәрҙәрен үреп, ылау менән оҙатып торалар. Сит тарафтарҙа ғүмер иткән ауылдаштар ҙа тыуған ауылы өсөн янып-көйөп торалар, улар һәр ваҡыт ярҙам ҡулын һуҙырға әҙерҙәр.
Ошондай дәртле һәм эшһөйәр халыҡ көн иткән, бихисап арҙаҡлы һәм талантлы кешеләре менән дан ҡаҙанған ауылдың “Айыҡ ауыл-2022” республика бәйгеһендә лайыҡлы сығыш яһауында бер кемдә лә шик тыумағандыр. Һәм шулай булды ла: әбүбәкерҙәр мәртәбәле еңеүгә – 2-се урын алыуға өлгәште һәм ауылды төҙөкләндереүгә 3,5 миллион һумлыҡ сертификатҡа лайыҡ булды. Ауыл старостаһы Рамаҙан Назаров әйтеүенсә, һуңғы йылдарҙа Әбүбәкерҙә төҙөкләндереү буйынса байтаҡ эштәр башҡарылған, шул иҫәптән мәҙәниәт йорто ремонтланған, өс күпер төҙөкләндерелгән, “Ихлас” мәсете, балалар майҙансығы, клуб һәм Ветерандар аллеяһының ҡоймалары яңыртылған, мәсет бинаһы тышҡы яҡтан профлист менән көпләнгән һәм башҡалар. Әйткәндәй, Рамаҙан Насибулла улы уҙған йылдың һөҙөмтәләре буйынса “Һөнәре буйынса иң яҡшыһы” район конкурсының “Иң яҡшы староста” номинацияһында еңеү яуланы.
Ауылда тормош уңайлы булһын, халыҡ матур йәшәһен өсөн тырышҡан, туған телен һәм бай мәҙәниәтен һаҡлаған, сәләмәт тормошҡа әйҙәгән бөтә әбүбәкерҙәргә һәр изге башланғыстарында уңыштар теләбеҙ!