«Айыҡ ауыл-2023» республика бәйгеһендә ҡатнашҡан Оло Әбеш ауылында «Имен тәбиғәт – һау киләсәк» төбәк-ара экологик фәнни-ғәмәли форумы үтте. Уның сиктәрендә оҫталыҡ дәрестәре ойошторолдо, мәҙәниәт усағының фойеһында Оло Әбеш ауылы оҫталарының һәм мәктәп уҡыусыларының ҡул эштәре, урындағы шифалы үләндәр һәм емеш-еләктәр, 2021 йылда урман янғынлары менән көрәште һүрәтләнгән фотографиялар күргәҙмәләре урын алды. Теләгән һәр кем шифалы үләндәр һәм емеш-еләктәр ҡушып әҙерләнгән самауыр сәйен ауыҙ итте.
Ошо күргәҙмәлә ҡатнашҡан Оло Әбеш ауылында тыуып үҫкән мәғариф хеҙмәте ветераны Илдар Юнысов та үҙенең эштәре таныштырҙы– уларҙың барыһы ла оҫтаның ҡулдары алтын икәнен әйтеп тора. Күңелгә ял алырлыҡ шөғөлө булған кеше бәхетле булалыр. Ябай ғына ҡайын туҙында – караптарҙы йә тау-урмандарҙы йә иһә биналарҙы сағылдырған картиналар, ағас киҫәгендә әллә ниндәй һын күреп, уға серле төҫ биргән, күҙҙең яуып алырҙай әйберҙәр эшләгән оҫталарға афарин тиергә генә ҡала.
–Бәләкәйҙән һүрәт төшөрөргә яратам, шуға ла Оло Әбеш мәктәбен тамамлағандан һуң, үҙемдең теләгемде бойомға ашырып, художество-графика бүлегенә уҡырға индем. Ике диплом эшемде – Советтар Союзы Геройы Ҡәйүм Әхмәтшиндың бюсын һәм Афған һуғышында һәләк булған Булат Сәйфуллиндың барельефын тыуған ауылымдың мәктәбенә бүләк иттем. Әйткәндәй, улар әле лә шунда һаҡлана. 35 йыл Ғәлиәхмәт мәктәбендә уҡыттым, түңәрәктәр алып барҙым. Бөгөнгө күргәҙмәгә йүкә ағасынан юнып яһалған һындар – “Салауат Юлаев” клубының хоккейсыһы, башҡорт яугиры, ҡурайсылар һындары, шулай туҙҙан яһалған картиналар алып килдем. Һүрәттәр менән биҙәлгән өҫтәлдәр ҙә эшләнем. Һуңғы йылдарҙа ҡайын туҙынан картиналар төшөрөү менән мауығам. Тәбиғәттең мөғжизәһе сикһеҙ, ябай ғына туҙҙа ла матурлыҡты күрергә була. Мәҫәлән, бынау туҙҙағы ҡара тап парусты хәтерләткәс – уның тирәләй буяу менән диңгеҙ төшөрһәң, әҙер картина килеп сыға. Ә быныһы урман менән ҡапланған ҡаялы тауҙарҙы хәтерләтә һәм башҡалар. Ағастан һын яһау – ул нескәлек һәм таҫыллыҡ талап иткән оҙайлы процесс. Бер әйберҙе эшләүгә ике аҙна, ә ҡайһы берҙә, ҡатмарлығына ҡарап, унан да күберәк ваҡыт китә, – тине Илдар Танһыҡ улы.