Бергә иңгә-иң терәп ғүмер юлын үткәндә, сабырлыҡ һәм аҡыл менән йәшәгәндә генә тормош карабы ғаиләне ел-дауылдарҙан һаҡлап алып ҡала. Аҡъяр ауылында йәшәүсе Мәғәз һәм Филүзә Ишемғоловтар тап шундай ғаилә.
Ишемғоловтарҙың татыу ғаиләһе 2008 йылдың сентябрь айында барлыҡҡа килгән. Аҡъюл ауылы егете Мәғәз Ғәбделһаҙый улы 1981 йылда ғаиләлә икенсе бала булып донъяға килгән. Мәктәптән һуң әрмелә хеҙмәт итә. Әле ул газ хеҙмәтендә водитель булып эшләй. Буш ваҡыттарында “Газель” машинаһында эшләп, ғаилә бюджетын тулыландыра.
-Тормош иптәшем беҙҙең матур һәм етеш тормош өсөн тырыша. Бер ҙә ҡул ҡаушырып ултырмай. Эшендә лә, өйҙә лә өлгөрә. Миңә лә йорт эштәрендә ярҙамлаша, - ти Филүзә Азат ҡыҙы.
Ғәлиәхмәт ауылы ҡыҙы Филүзә Ишемғолова 1985 йылдың йәмле май айында донъяға килгән. Ауылда урта мәктәпте тамамлағас, БДУ-ның Сибай институтында белем ала. Әлеге көндә “Ғаилә” хеҙмәтендә эшләй. Өҫтәүенә 5 йыл ирекмәнлек эшмәкәрлеген уңышлы алып барып, төрлө кимәлдәге бихисап Маҡтау ҡағыҙҙарына лайыҡ булған. Әле Филүзә башҡа ирекмәндәр менән бергә махсус хәрби операцияла ҡатнашыусы яугирҙарға гуманитар ярҙам күрһәтә. Көҙ көнө отпускыһында үҙҙәренең ишек алдында маскировкалау халатын үреү эшен дә ойошторған. Был эштә улдары ла ярҙамлашҡан.
-Эшем оҡшай. Ғаиләләр менән эшләгәс, айырыуса эшемдең һөҙөмтәһен күреү ҡыуаныслы. Ирекмәнлек эше менән пандемия ваҡытында ныҡлап шөғөлләнә башланым. “Беҙҙең хәстәрлек” тигән төркөм булдырып, өлкәндәргә, инвалидтарға дарыу һәм аҙыҡ-түлек ташыныҡ. Шулай уҡ янғын осоронда ла ярҙам иттек. Әле яугирҙарға ярҙам итәбеҙ. Улар менән даими бәйләнештәбеҙ. Төрлө йүнәлеш буйынса гуманитар ярҙам әҙерләйбеҙ. Ирекмәнлек – ул күңелем талабы,- ти Филүзә.
Ишемғоловтар 3 балаға: ике ул һәм бер ҡыҙға ғүмер бүләк иткән. Балаларын илһөйәр, телһөйәр, эшһөйәр итеп үҫтерә улар. Өлкән улдары Алмаз 2-се Аҡъяр мәктәбендә 7-се, кесеһе Илназ 6-сы класта уҡый. 7 йәшлек ҡыҙҙары Камила “Йәйғор” балалар баҡсаһына йөрөй.
Матурлыҡты, гүзәллекте күрә белгән ата-әсә балалары өсөн үрнәк булып тора. Дәүләт ярҙамы алып ҙур, иркен йорт һалып сыҡҡандар. Ҡош-ҡорт тоталар, мул итеп баҡса үҫтерәләр, картуфын да ултырталар. Киләсәктә кәртә-ҡураларын ҙурайтып, мал аҫрарға ла уйҙары бар. Балалары ла уңған атай һәм әсәйгә ҡарап эшкә өйрәнеп үҫә. Әле үк улдары утын ярып, үлән сабып аҡса эшләйҙәр. Бының өсөн триммер ҙа һаттырып алғандар. Йәй буйы эшләп, уның һатып алған хаҡын да ҡаплағандар.
Матур тормош көтөргә ынтылған Ишемғоловтар күптәр өсөн өлгө ул. Ғаилә башлығы ла, хужабикә лә уңған булғас, донъялары ла сынъяһау. Мәғәз Ғәбделһаҙый улының да ҡулы белмәгән эш юҡ. Айырыуса техниканы яҡшы белә. Еңел автомобилен дә, Газель, эш машинаһын да автосервисҡа алып бармай, үҙе ремонтлай.Туғандары һәм хеҙмәттәштәре араһында абруй ҡаҙанған.
Филүзә Азат ҡыҙы эшенән буш ваҡытында бешеренергә оҫта. Ял көндәрендә ғаиләһен тәмле ризыҡтар менән һыйлай.
-Ялымды аш-һыу бүләмәһендә үткәрәм. Кесе улым Илназ менән бергәләп төрлө тәм-том әҙерләйбеҙ. Ғөмүмән, тынғыһыҙ эш араһында ғаиләмә иғтибар бүлергә, өй йылыһын булдырырға тырышам, - ти хужабикә.
Өлгөлө ғаилә балалар тәрбиәләүгә ныҡлы иғтибар бүлә. Атай абруйы, әсәйҙең аҡыллы кәңәше беренсе урында. Айырыуса өйҙә туған телдә һөйләшеү маҡсаты ҡуйылған. Шуға күрә лә Ишемғоловтарҙың балалары ике телде лә яҡшы белә.
Матур ғаилә – ил күрке, тиҙәр. Филүзә һәм Мәғәз Ишемғоловтар ана шул ил күркен тәшкил иткән ғаиләләрҙең береһе.
Рәзилә Байғусҡарова.