Менә шундый исем астында узган ачык шәһәр фестиваль‑конкурсында 706 катнашучы төрле номинацияләрдә 196 номер тәкъдим итте. Яшь йолдызчыкларның талантын бәяләр өчен жюрига 13 сәгать вакыт таләп ителде
Башкортстан Республикасы башлыгының Грантлар фонды ярдәме белән гамәлгә ашырыла торган иҗади проект сәнгатькә гашыйк малайларны һәм кызларны зур сәхнәдә беренче тапкыр гына очраштырмый.
Яшьләр сараенда үткән «Матурлыкка синең юл» фестиваленең гала‑концертында яшь талантларны БР мәдәният министрының беренче урынбасары Наталья Лапшина, БР мәгариф министрының беренче урынбасары Светлана Антипина, БР Грантлар фонды вәкиле Елена Рудявко һәм хакимият башлыгы Алексей Пальчинский җылы сәламләде.
Наталья Лапшина Башкортстан Башлыгы Радий Хәбиров исеменнән сәламләү хатын укыды. Наталья Михайловна барлык катнашучыларны иҗат бәйрәме белән котлады, бәйгенең инициаторы Тамара Беловага һәм аның командасына бу искиткеч проектны тормышка ашырганнары өчен, шулай ук ата‑аналарга һәм остазларга сабырлыклары, зур хезмәтләре өчен рәхмәт белдерде. Йөзләгән талантлы баланың хыялын тормышка ашырган фестивальне оештыруда һәм уздыруда ярдәм кулы сузган җирле муниципалитет башлыгына аерым рәхмәт сүзләре яңгырады.
Үз чиратында Алексей Евгеньевич конкурста катнашучыларны ирешелгәннәрдә тукталып калмаска, иҗат итәргә һәм яңа җиңүләр яуларга чакырды.
Конкурс кысаларында иҗади коллективлар һәм солистлар дүрт номинациядә — хореография, вокал, инструменталь башкару һәм сәнгать иҗатында осталык күрсәтте. Алар үзләренең кабатланмас һәм якты музыкаль номерларын бүләк итте.
«Матурлыкка синең юл» фестиваль‑конкурсында катнашучылар җылы хис‑тойгылар, күңел күтәренкелеге һәм онытылмас хатирәләр белән беррәттән, истәлекле бүләкләр белән дә билгеләнде. 1, 2, 3 дәрәҗә лауреатлар һәм гран‑при ияләре грамоталар һәм призлар белән бүләкләнде. «Йолдыз тууы» номинациясендә катнашучыларга Уфа шәһәренә экскурсиягә сертификатлар тапшырылды.