7 февралдә төбәк халҡы мөһим дата - Башҡортостан Республикаһының беренсе Президенты Мортаза Ғөбәйҙулла улы Рәхимовтың тыуыуына 90 йыл тулыуҙы билдәләне. Ул 1993 йылда Башҡортостан Президенты итеп иғлан ителә. Республика менән 2010 йылдың уртаһына тиклем етәкселек итә. Был йылдарҙа социаль өлкәне үҫтереүгә ҙур иғтибар бүленә: яңы мәктәптәр, балалар баҡсалары, дауаханалар төҙөлә, ауылдарға һәм ҡасабаларға «зәңгәр яғыулыҡ» килә, иҫке биналар күпләп реконструкциялана һәм башҡа бик күп эштәр башҡарыла. Уның тырышлығы менән туған телдәрҙе һаҡлау, дәүләт телдәренә ярҙам итеү өсөн шарттар булдырыла, милли-мәҙәни үҙәктәр ойошторола.
Президент эш сәфәре менән бер нисә тапҡыр беҙҙең районға ла килеп китте. Уның ярҙамында ауылдарҙа газ үткәрелә, юлдар төҙөлә, торлаҡ төҙөлөшө йылдам бара, социаль-мәҙәни әһәмиәттәге объекттар ҡалҡып сыға. Ә 2007 йылдың 24 ноябрендә Дәүләкән ҡалаһында реконструкциянан һуң 3-сө башҡорт гимназия-интернаты асыла. Уҡыусыларҙың һәм педагогтарҙың шатлығын уртаҡлашырға Мортаза Рәхимов килә. Мәктәп коллективы бының менән әле лә ғорурлана. Сөнки, әлеге директор Ғәлиә Ғүмәрова билдәләүенсә, Президент һәр мәктәпкә килмәй. Ул йылдарҙа мәктәп директоры Рәйлә Дәүләтова була. Төҙөлөш эштәре уның контроле аҫтында алып барыла, шуға күрә Рәйлә Сәғит ҡыҙына М.Ғ. Рәхимов менән шәхсән осрашыу, аралашыу, эш буйынса һорауҙарына яуап биреү бәхете тейә.
Ул төбәк етәксеһе, реконструкциянан һуң мәктәпте асыу тантанаһында уның менән осрашыу мәлдәре хаҡында хәтирәләре менән уртаҡлашты:
«Ул балаларҙы һәм уҡытыусыларҙы яңы бина асылыуы менән ҡотланы, унан инде район хакимиәте вәкилдәре оҙатыуында мәктәп буйлап экскурсия яһаны, китапханала, спорт залында, мәктәп музейында, ашханала булды, һуңынан тамашалар залында уҡыусылар әҙерләгән концертты аҙағына тиклем ҡараны. Мин уның эргәһендә ултырҙым һәм Президентыбыҙҙың эшенең төп йүнәлеше - республика граждандары, үҫеп килеүсе йәш быуын хаҡында хәстәрлек күреү икәнлеген аңланым», - тине ул.
Тамашалар залында М.Ғ. Рәхимов тураһында шиғырҙар һәм йырҙар яңғыраны. Видеослайдтарҙа уның тормошонан һәм хеҙмәт эшмәкәрлегенән ҡыҙыҡлы факттар күрһәтелде.
Сараны йомғаҡлап, 3-сө башҡорт гимназия-интернаты директоры Ғәлиә Ғүмәрова беренсе Президентыбыҙ тураһында хәтирәләр уҡыусылар һәм уҡытыусылар күңелендә һаҡланасаҡ, тип белдерҙе.
Иҫтәлекле көндө ҡала һәм райондың белем биреү учреждениеларында республикабыҙҙың беренсе Президенты иҫтәлеге хөрмәтенә класс сәғәттәре үтте.
Алия Уразбахтина.
И. Кәримова фотоһы.