Ғаиләне яҡлау һәм традицион ҡиммәттәрҙе һаҡлау өлкәһендә дәүләт сәйәсәтен популярлаштырыу маҡсатында 2024 йыл Президент Владимир Путин указы менән Рәсәйҙә Ғаилә йылы тип иғлан ителде. Уны асыу тантанаһында концерт номерҙары күрһәтелә, спорт саралары ойошторола. Башҡортостан да был йәһәттән ситтә ҡалмай - республиканың һәр муниципалитетында тантаналы саралар үтә. Дәүләкәндә бындай сара район Мәҙәниәт йортонда булды, унда «ғаилә тормошо стажы» туплағандар саҡырылды. Улар араһында күп балалы, район тормошонда әүҙем ҡатнашҡан ғаиләләр, тәрбиәгә бала алған ата-әсәләр бар ине.
Ҡунаҡтарҙы район хакимиәте башлығы Илгиз Мөхәмәтйәнов ҡотланы. Ул муниципалитетта лайыҡлы һәм ныҡлы ғаиләләрҙең күп булыуын билдәләне. Районда 3000 күп балалы ғаилә иҫәпләнә, 112 әсә «Әсәлек даны» миҙалы менән бүләкләнгән. Былтыр ҡалала йәшәүсе Гөлназ Ҡорманаеваға «Герой-Әсә» исеме бирелде. Ә уның ире Артур «Атай ҡаһарманлығы» һәм «Ата-әсә ҡаһарманлығы» миҙалдары менән билдәләнгән. Ирле-ҡатынлы ун бер бала тәрбиәләй, Ҡорманаевтар ҙа байрамда ҡатнашыусылар араһында ине.
Вячеслав менән Светлана Шабалиндар ун бер бала тәрбиәләй. Ғаилә башлығы - Чечен Республикаһы территорияһындағы хәрби хәрәкәттәр ветераны, Эске эштәр министрлығының Йәмәғәт советы һәм республиканың «Атайҙар советы» ағзаһы. Светлана Шабалина өсөнсө һәм икенсе дәрәжә «Әсәлек ҡаһарманлығы» наградаһы менән билдәләнгән.
Байрамға саҡырылған Исламовтар ғаиләһендә туғыҙ бала тәрбиәләнә. Рөстәм Исламов - «Самбо-75» балалар-үҫмерҙәр спорт мәктәбе тренер-уҡытыусыһы, урындағы «Иман» дини ойошмаһы етәксеһе. 2023 йылда ғаилә «Ата-әсә ҡаһарманлығы» наградаһы менән билдәләнгән. Эльвира Рәмил ҡыҙы «Әсәлек даны» миҙалы менән наградланған.
Байрамға килгән тағы бер күп балалы ғаилә – Ғәлимовтар. Ирле-ҡатынлы биш бала тәрбиәләй. Ғаилә башлығы Марсель Ғәлимов - самбо мәктәбе тренер-уҡытыусыһы, Әхиәр Хәкимов музейы етәксеһе. Ул - Батырлыҡ ордены кавалеры, «Атай ҡаһарманлығы» наградаһы менән билдәләнгән.
Йылды асыу тантанаһына тәрбиәгә бала алған ата-әсәләрҙе лә саҡырҙылар. Миңһылыу Ғәлләмова ата-әсә ҡарауынан мәхрүм ҡалған өс бәлиғ булмаған бала тәрбиәләй. Әүҙем тормош позицияһы өсөн уға Дәүләкән районы хакимиәтенең рәхмәт хаты тапшырылды. Вәлиевтар дүрт баланы тәрбиәгә алған, уларҙың береһенә 18 йәш тулған инде. Ә ошо көндәрҙә уларҙың ғаиләһе йәнә артҡан – ир менән ҡатын тәрбиәгә йәнә ике бала алырға ҡарар иткән. 2022 йылда Флорид Фәрит улы һәм Илмира Минеғәзим ҡыҙы «Йыл ғаиләһе» Бөтә Рәсәй конкурсының республика этабында «Алтын ғаилә» номинацияһында еңеүсе тип танылды.
Усмановтар ҙа байрам ҡунаҡтары булды. Ғәлим Бәвәтдин улы менән Рәйлә Нил ҡыҙы - «көмөш» ирекмәндәр. Улар «Изгелек һәм Хәстәрлек оҫтаханаһы»на йөрөй. Ғаилә башлығы маскировка селтәрҙәрен тарттырыу өсөн станоктар яһай, хәләл ефете селтәр бәйләй. Байрамда әле МХО зонаһында булған ирекмәндең ғаиләһе лә ҡатнашты. Яугирҙың ҡатыны балалары менән килгәйне. Кесе ҡыҙҙары тасуири итеп шиғыр һөйләне.
Саҡырылғандар араһында Бакаевтар ғаиләһе лә булды. Рөстәм менән Лилиә өс бала тәрбиәләй. Ирле-ҡатынлы теплица эше менән шөғөлләнә. Күп йылдар дауамында район тормошонда әүҙем ҡатнаша, «Яңы йыл ғаилә уйындары»ның муниципаль этабы еңеүселәре.
-Ошо матур байрамға саҡырғанығыҙ өсөн рәхмәт, - тине Рөстәм Бакаев. - Минеңсә, тап ғаилә беҙҙе әхлаҡи һәм рухи ҡиммәттәргә өйрәтә, ул кеше тормошонда мөһим роль уйнай.
Ғаилә йылын асыу хөрмәтенә саҡырылғандар өсөн концерт күрһәтелде. Әсәйҙәргә сәскәләр һәм татлы бүләктәр тапшырҙылар. Район Мәҙәниәт йорто фойеһында китапхана һәм Ғаилә хеҙмәте хеҙмәткәрҙәре балалар өсөн оҫталыҡ дәрестәре үткәрҙе. Байрам тамамланғас, килеүселәр бергәләп иҫтәлеккә фотоға төштө.
Светлана Кәлимуллина.
С. Чиков фотоһы.