Әйдәгез тормышның матурлыгын күрер өчен бүген стресска каршы торуның гади генә адымнар өйрәник.
Күпләребез зарлар сазына батты. Шуңа күрәмсең, кайвакыт кечкенә яхшылыктан, хәтта уңай күренешләрдән тискәресен эзлибез, ачу белән кабул итәбез. Арабызда иртәнге ашның да тәмен тоймаучылар бар, чөнки ковидтан соң тәм тою рецепторлары үз хәленә кайтмаган... Әйдәгез тормышның матурлыгын күрер өчен бүген стресска каршы торуның гади генә адымнар өйрәник.
Көлү гадәте
Безгә йогынты ясаучы күпчелек тышкы сәбәпләр тормышыбызны катлауландыра. Без аларына йогынты ясый алмыйбыз. Әмма моңа өстәп, “эчке дошманнар” да була әле. Менә аларын инде без үзебез җиңә алабыз. Беренчесе – игътибарны негативка юнәлтү. Теләсә нинди вакыйгада кеше начарлык күрә, үзен һәм башкаларны сүгә, шул хакта гына сөйли. Бу фикерләүнең һәм игътибарның иң начар гадәтләре. Аны үзгәртергә кирәк. Һәр вакыйгада кечкенә булса да яхшылык күрергә өйрәнергә кирәк: сәламәтлек бар, гаилә исән, минем тирә-ягымда барысы да тәртиптә. Негатив комачаулый, көчне суыра, яшәү тонусын төшерә. Ә бит башкача да була! Озын гомерлелекнең сере күтәренке кәефтә булуы күп тапкырлар исбатланган. Озак яшәүчеләр көлке һәм елмаю белән тирә-якта булган хәлләрдән үзләрен аерып куя белә.
Мактау гадәте
Әгәр кеше һәрвакыт кәефсез, ризасызлык белдерә һәм бөтен дөньяны тәнкыйтьли икән, аны уңышсызлык чоңгылы суырып ала. Аннан ничек чыгарга? Үзегезне һәр активлык өчен мактагыз! Теш чистарткан арада биегәнсез икән, кибеттә чиратта торганда ашыккан сатып алучыны үткәреп җибәргәнсез икән, кемдер алып барып җиткермәгән катыргыны чүп савытына илтеп салгансыз икән, кемдер ачуланганга елмаю белән җавап биргәнсез икән, Сез – маладис!
Мондый уңай эшләр үзе өчен яңа нейрон бәйләнешләр булдыра, сезне үстерә, тирә-яктагы дөньягызны аз гына булса да яхшырта. Бер үк вакытта сез тормыштан канәгать була башлыйсыз һәм уңыш җәлеп итәсез. Көчегез һәм сәламәтлегегез арта бара, иммунитетыгыз ныгый. Шуңа күрә үзегезне үстерүнең иң борынгы техникасын онытмагыз – бер көн эчендә үзеңә 10 рәхмәт. Һәм 2 атна үтүгә сез үзегездә активлык артуын сизәрсез.
Хәрәкәтләнү гадәте
Безнең күбебездә утырып эшли торган эш. Гиподинамия – безнең чорның бәласе, аның аркасында без агрессивка әйләнәбез, чөнки гәүдәнең андый торышында бәхет гармоннары бүленми. Алар өчен физик активлык кирәк. 45 минут саф һавада йөрүнең тынычланырга, үзеңне яхшырак хис итәргә булышуы исбатланган. Тик монда телефонсыз, музыкасыз йөрү турында сүз бара. Үз-үзеңне тыңларга яки реаль әңгәмәдәш белән булырга кирәк.
Көн дәвамында җыелган агрессиядән җыр һәм бию коткара ала. Юкка гына элек авыр хезмәттән соң кичләрен җырлашып утырмаганнар. Шул рәвешле алар стресстан арынган, көн дәвамында җыелган ачуын “эшкәрткән”. Һәркайсыбыз балачагында рәхәтләнеп җырлаганын һәм биегәнен хәтерлидер. Чөнки бу стресстан котылуның бердәнбер ысулы. Шулай ук әниләр бишек җырларын да юкка җырламаган. Бу сабый өчен бердәнбер тынычлану ритмы һәм иң яхшы тынычлану техникасы.
Дус булу гадәте
Безнең тормышның мөһиме өлеше – тирә-яктагылар. “Дустыңның кемлеген әйт һәм мин синең кемлегеңне әйтермен” дигән сүзләрне хәтерлисезме? Кеше социаль җан иясе. Аңа үзе кебекләр белән аралашырга кирәк. Позитив кешеләр белән аралашу аны баета, үз-үзен ачарга, бәхет өчен бик аз кирәк булуын аңларга булыша. Моның өчен янында бер якын изге кеше булу җитә. Ул синең шатлыгыңны да уртаклашыр, бәла килгәндә дә яныңда булыр. Ә менә тискәре эмоцияле кешеләр белән аралашу агрессия һәм ачу чоңгылының төбенә тарта.
Нидер эшләү гадәте
Стрессларга каршы тору өчен үз тормышыңа чагу төсләр өстәү дә яхшы ысул. Моның өчен күңелегезгә хуш килгән шөгыль табыгыз. Хобби, иҗат –иң мөһиме ул сезгә штлык, канәгатьлек китерсен, шәхес буларак сезне ачсын. Хуҗабикәләр юкка өйләрендә мебель күчереп йөрми. Алар шулай гадәти тормышларына үзгәреш кертә.