«Тигез мөмкинлекләр дөньясы» концерт‑мюзикл 2024 елда Башкортстан Республикасында игълан ителгән Сәламәтлек мөмкинлекләре чикле кешеләр елына старт бирде
Мәдәни чара шәһәрнең Халыклар дуслыгы йортында узды һәм аның төп хуҗалары һәм кунаклары физик мөмкинлекләре чикле кешеләр үзләре булды. Алар янәдән киң җәмәгатьчелеккә, нинди генә авыр чирләргә һәм чикләүләргә дучар булуга карамастан, үзләренең никадәр көчле рухлы, актив булулары һәм тормышны яратулары турында сөйләделәр.
Мәдәният учагының зур залында төп тантана башланганчы, фойеда «Семья», «Дари добро» үзәкләре, 19нчы коррекция мәктәбе коллективлары төрле кул эшләре күргәзмәләре оештырды, мастер‑класслар уздырды. Күргәзмәдә үзләренең кул эшләре белән шәхси затлар да катнашты. Әйтик, өченче төркем инвалиды Татьяна Харитонова бәйләргә дә, чигәргә дә, тегәргә дә бик оста. Ул иҗат иткән курчаклар, брошкалар, заколкалар күз явын алырлык. «Бары тик теләк кенә кирәк. Шул очракта барысы да уң була», — диде шәһәрдәшебез.
Сәламәтлек мөмкинлекләре чикле кешеләр елы ачылу белән тәбрик итәр өчен сәхнәгә күтәрелгән шәһәр хакимияте башлыгы урынбасары Октябрь Латыйпов та инвалидларда нәкъ менә яшәү һәм үсү теләгенең зур булуы белән соклануын яшереп кала алмады.
— Әмма мин аларны инвалидлар дип атаудан баш тартам. Алар физик мөмкинлекләре чикле булган, әмма рухи мөмкинлекләре чиксез булган кыю йөрәкле кешеләр. Башкортстан хакимият һәм сәламәтлек мөмкинлекләре чикләнгән кешеләр арасындагы мөнәсәбәтләр урнаштыру буенча лидер булып тора. Мондый кешеләрнең тормышын җиңеләйтү өчен республикада да, безнең шәһәрдә дә күп эшләр башкарыла. Һәм 2024 ел безнең янәшәдә безнең ярдәмгә мохтаҗ кешеләр яшәвен тагын бер кат искәртеп торачак. Безнең шәһәрдә Бөтенрусия инвалидлар җәмгыятенең җирле оешмасы актив эшли, ул мөмкинлекләре чикле кешеләрне берләштерә, алар өчен кызыклы чаралар оештыра, аларга күп кенә көнкүреш мәсьәләләрен уңай хәл итәргә ярдәм итә. Ә «Каршылыкларсыз» үзәгенә исә, мөгаен, республикада тиңнәр юктыр. Биредә иҗат һәм спорт белән шөгыльләнү, уку һәм ял итү өчен менә дигән шартлар тудырылган. Бөтенрусия саңгыраулар һәм сукырлар җәмгыятенең шәһәр оешмалары, «Радуга» сәламәтлек мөмкинлекләре чикләнгән балалар һәм яшүсмерләрне тернәкләндерү үзәге үз эшчәнлекләрен уңышлы алып бара. Шунысы куанычлы, әлеге оешмаларның әгъзалары сәнгатьтә генә катнашып калмый, алар спортта һәм физик культурада да көчле шәхесләр. Мин һәрвакыт сездә булган ихтыяр көченнән, батырлыктан үрнәк алам, сокланам, һәм киләчәктә дә сез авырлыклар алдында югалып калмаячагыгызга ихлас ышанам, — дип билгеләп үтте үз чыгышында Октябрь Рәис улы.
«Тигез мөмкинлекләр дөньясы» концерт‑мюзикл Татьяна Кетько җитәкчелегендәге инвалидлар оешмасы, «Каршылыкларсыз» социаль‑мәдәни үзәге, картлар һәм инвалидлар өчен интернат‑йорт, «Радуга» физик мөмкинлекләре чикле балалар һәм яшүсмерләрне тернәкләндерү үзәге активистлары көче белән әзерләнгән иде. Чыннан да, әлеге күңелле тамаша бернинди авырту һәм сызлаулар да кешене матурлык дөньясыннан ваз кичтерә алмавының якты бер дәлиле булды. Сәхнәгә үз аякларында, волонтерлар ярдәмендә яки инвалидлар арбасында чыккан кешеләрдә сәнгатькә, тормышка, дөньяга булган эчкерсез мәхәббәтнең чиксез булуы аларның һәр чыгышында чагылды. Илгизәр Урманов уйнаган синтезатор моңына кушылып Ирина Хәсәншина укыган шигырь юллары, Александр Кормин башкарган «Мин сине яратам, тормыш» җыры, «Якутлар» бию‑вокал күренеше, «Виновата ли я» һәм аеруча да зур осталык белән башкарылган «Русская рать» кебек дәртле җырлар тамашачылар тарафыннан җылы кабул ителде. Ә тамаша залында бу кичне чын мәгънәсендә алма төшәр урын да юк иде. Йөзләрдә балкыган шат елмаю хисләре, көчле алкышлар, хуплау авазлары...
Тормышта мөмкинлекләр дөньясы, чыннан да, тигез, бары тик яшәүнең ямен һәм тәмен генә тоя белергә кирәк.
Илмира ГАЛИЕВА
Автор фотосы