Сеяха’ хардахана ӈарка ненэця”, вадёданна” хасава ӈацекы” тэри мэваӈгадандо’ етри” ныхыдо’ хорпи”. Теда’ хэвы нылана яляха”на СОК «Айсбергхана» ненэця” ма”лыць
Сеяха’ хардахана ӈацекы тохоламбада Иван Окотэтто няби спорткомлексхана манзрана Руслан Яптик пирдырмам’ таславэхэ’.
– Мань хасава нюми’ сянаку. Пыда Салехардахана тохолку. Сырэй ныланава яляха”на мякнанда мэсь. Хэбянда нерня пирдыртаха”на ныхымда хорманзь тось. Нюртей яля’ санарць нябимдей местам ханась. Мань хасава нюми етри нерняку пэрнав, вадахана нядабив. Варемда мэна. Салехардахана тохолку. Тайнанда ӈобтарем’ спортм’ мэ”ӈа, ӈули” молодец. Тедахав’ хуркари спорткоплекс тня, ӈацекы” спортзалан’ ха”на”. Ӈавна тарця юӈгусь. Маня” пихиня хамекосетыва”, сюрберцетыва”, ярколасетыва”, – Родион Окотэтто ма, пыда хой’ тер”.
Родион Окотэтто хасава нюнда ня’ товэхэ’. Пыда ӈавна соревнованияха’ ханцеты”. Сюртевы яда ӈока, Сеяхам’, Ямальский районм’ пирдырць нита ня’ нерня’ минресеты”. Надым’ маркна сянакосеты, Саляхардан’ тэворцеты, Яр-Салян’ ханцеты, таняна пирдарцеты. Теда’ хасава нюда Александр ӈобтарем’ варемда мэ”ӈа.
– Мань Салехардахана многопрофильной колледжахана тохолкудм’. Автомеханик манзъя’ тэнзм’ тохоламбидм’. Тохолкова ӈули’ сава. Сеяха’ тер” тохолко нята нини’ Борис Вануйто, Игорь Сэротэтто, Влад Окотэтто. Каникул’ пудана яляхана сянакоди’ понд’ тэвыв. Пыхыдами’ хорпидамсь. Тройной национальной прыжокхана нябимдей местам’ ханадамсь. Ямбдаханда 9 метров 41 см санадамсь. Тад хано санарпидамсь, ӈока сананами’ юӈгу. Нисями’ си”ми тохоламби. Пыда ӈавнанда чемпионась. Мань ӈобтарем’ тарем’ харвадм’. Салехардахана северное многоборьен’ «Авиаторм’» нюбета клубан’ ханцетыва”. Тикы’ хавна тренажеркан’ ханӈадм’, волейболхана, теннисхана сянакудм’, – Александр Окотэтто ма, пыда студент.
Едэй похона, нюдя пэвдей’ ирыхана спортивно-оздоровительной комплексхана Сеяха’ тер” ӈани’ ӈобт’ ма”лыць. Хой’ тер”, тохолкода ӈацекы”, илебей хасава” ныхым’ хорманзь тэвыдаць. Луца’ вадавна хэта, тэри тренировка. Няхар” яля’ ямбдан’ СОК «Айсбергхана» марнаць. Нюртей яля’ сюрберӈаць. Сидя юкад вата ненэця” мале сян час’ сян юд’ сюрхалм’ сертавакы”, толырто юӈгу.
– Спорткомлекс’ спортзал’ мюмня 50 сюрхалм’ сюрамба пирдаледамсь. Тиками’ 14 минутахана сюртев. Няби яляхана тюрм’ яркыбиваць. Ярколавам’ хамзав. Няхаромдэй яляхана са-нарӈаваць. Мань нидамсь санар”. Мань тренировкаха’ ханцетыдм’. Иван Игоревич няби Руслан Андреевич нянана” манзраӈаха’. Тренировкава ӈока, – Максим Окотэтто ма, пыда Сеяха’ харад’ тохолколва мякна тохолкода ӈацекы.
Сюрберта” сидяхана сюрберӈа”. Спортзал’ няби ерня ӈоб’ хамекода, няби хэвхана няби сюрамбаванда. Хэвхананди’ секундомерм’ ня”амбадаха’, тад тамна сидя сюрхал толабихи’. Хусувэй сянакованзь хамеку. Ханяны” етя сюрберӈа”, ӈани’ манзъядо’ тарця, тад ханяӈы” пирдырма’ нерцюрина хамекосеты”.
– Нюдя пэвдей ирыхана интернатхана соревнованияха”на мэвы ӈаце-кы”на ня’ награждением’ мэ”ӈаваць. Хусувэй по’ сельбя’ няна соревнованияна” таня”, нюмда «Золотая осень». Вэба’ ирыхана, хор” ирыхана, носиндалва’ ирыхана Руслан Андреевич ня’ ӈацекыни’ хорпинись. Тикахана тохолкода ӈацекы” помнандо’ сянакуць. Мале сян пирдырма’ тэнзм’ мэ”ӈаваць: ӈацекы” сюрберӈаць, хано санарпиць, тубкам’ моёпиць, тюрм’ яркыбиць, няхар” санарӈаць. Ӈаркамбой ӈацекы харто’ помнандо’ сянакуць, нюдямбой ӈобтарем’ харто’ помнандо’ пирдырӈаць. 12-13 по’ харто’ помнандо’, 14-15 по ӈани харто’ сидто’ ӈар” няха”нато’ сянакуць, тад 16-17 потна” ӈацекы” пирдырӈаць. Тикы’ е”эмня кубок тэмданись, медаль”, грамоты сертаваць. Ӈацекыни’ варемдо’ мэцеты”, ёльце сава”, харбё”, – Иван Окотэтто ма, пыда Сеяха’ тохолкова хардахана манзра.
– Сюрберта” ненэцяина’ спортзал’ мюмня самляӈг ю” сюрхалм’ сертаби”. Тикар няхар” километр. Ненэ’ тарем’ таслаб’, хахаяда я вуниӈа. Пыхыдадо’ хамедамбдахавахана тоянанада юӈгу. Спортсменна” ӈули” сава”, сянакованзь турӈа”, тренировки мэ” ӈа”. Тадри сянакова яля” пэӈгуд. Хамедё тара, тикы’ е”эмня ненэцяина” хамеку”, – Руслан Яптик ма, пыда СОК «Айсберг’» манзрана.
Тандая’ хэвы ныланава яляха”на СОК «Айсбергхана» ненэця” ӈани’ ӈобт’ ма”люрӈаць. Январь’ 21 яляхана спортзал’ мюй панӈась. Няхар” дисциплинам’ мэ”ӈаць: тюрм’ яркыбиць, хано санарпиць, тад ямб’ сер” санарӈаць. Ӈацекы”, ӈаркамбой хасава ӈоб’ сер” пирдырӈаць. Тикы хэвы ялядо’ ӈули” савовна хаясь. Тарем’ Сеяха’ тер” янамбовна сянакова ялян’ хамеку”, тад харто’ пыхыдадо’ нерняку’ минре”, тэри ни’ ӈамдю”.
Антонина Серасхова