Әнүзә Сәйфуллина – Таймый ауылының иң өлкән йәштәге әүҙем ветераны. Былтыр көҙөн 90 йәшен тултырған. Әммә уға был йәште һис тә бирерлек түгел.
Йорто тыштан уҡ бында уңған хужабикә йәшәүен күрһәтә. Оло йәштә булыуына ҡарамаҫтан, бәрәкәйҙәре менән бергә 20 баш һарыҡ аҫрай, мул итеп баҡса үҫтерә, йәй көндәре йорт тирәһен гөл-сәскәгә күмә.
– Былтыр 20 ҡаҙ, 8 өйрәк алып үҫтерҙем. 35 биҙрә бәрәңге ултырттым. Хәҙерге йәштәрҙең мал-тыуар, ҡош-ҡорт тотмауына, баҡсаларын буш ятҡырыуына аптырайым. Беҙ гел эшләп йәшәнек бит ул, – тип хәбәрҙәрен теҙҙе Әнүзә Биктимер ҡыҙы.
Ул Таймый ауылында тыуған. Атаһы һуғышҡа киткәндә туғыҙ йәш була. Әсәһе һауынсы булып эшләй. Әнүзә лә йәшләй ауыр хужалыҡ эшенә егелә. Аҙаҡ ғүмер буйы “Таймый” совхозында төрлө эштәр башҡара.
– Баҫыуҙағы борсаҡты салғы менән сабып алабыҙ, аҙаҡ уны комбайн һуға торғайны. Йәй көнө совхозға ҡул көсө менән бесән әҙерләнек. Ялан эше бөткәс, һарыҡтар йөнөн алабыҙ. Ә көҙөн келәттә ашлыҡ таҙарттыҡ. Ҡыш көнө генә әҙерәк ял эләгә ине. Совхоз директорыбыҙ Хәниф Туҡтар улы Заһиҙуллин яҡшы кеше булды, – ти хеҙмәт ветераны.
Әнүзә Биктимер ҡыҙы ире Дарвин Хәкимйән улы менән биш бала тәрбиәләп үҫтергәндәр. Ғаилә башлығы оҙаҡ йылдар совхозда тракторсы булып эшләгән. 16 йыл элек 74 йәшендә вафат булған. Бала ҡайғыһы ла урап үтмәгән. Улы Айбек һәм ҡыҙы Әлфиәнең үлемен кисерергә тура килгән. Бала саҡтан инвалид улы Вилде ҡарап үҫтергән. Бер ҡыҙы Альмира Таймыйҙа йәшәй, Илфираһы – Ахунда тормошта. 9 ейән-ейәнсәр, 8 бүлә-бүләсәргә һөйөклө өләсәй ул.
Айҙар Саматов.