Мәдрәсәдә һәм параллель мәктәптә укыган чак. "Укыган чак" - җиңел әйтелгән әле. Мәктәптә чыгарылыш ел, мәдрәсәдә дә шул ук хәл. ЕГЭ га, имтиханнарга әзерләнергә, аның өстенә курс эшен язырга кирәк. Икенче төрле генә әйткәндә көне-төне укырга да укырга, йокыга монда урын юк.
"5" легә генә укыдым дип әйтә алмыйм, ләкин тырышып укыдым. Ә соңгы айларда икеләтә тырыштым. Рус әдәбиятыннан ЕГЭ бирергә уйладым. Аңа кадәр шушы фән белән кызыксынмаганга, барысын да яңа баштан башларга туры килде. Ник рус әдәбиятын сайладым? Чөнки ул миңа икенче уку йортына керер өчен кирәк иде. "Ансыз булмый" дип уйладым мин. Әмма ансыз да булган икән, моны соңыннан гына белдем. Ярар, монысы аннары. Бу фәнгә тотынгач ул миндә кызыксыну уятты, шундый бер үзенә күрә рәхәтлек белән өйрәнә башладым мин аны. Чыннан да ихлас күңелдән үз ит
тем. Булгаковның "Мастер и Маргарита"сын, Лермонтовның "Герой нашего времени" әсәрен, Пушкинның, Гогольнең хикәяләрен, повесть- романнарын искитеп укыдым. Шулай итеп печтик кенә булса да өйрәнергә дә җиңелерәк булды кебек. Тик бу вакытны күп ала иде. Башка фәннәрне дә карарга кирәк бит, мәсәлән рус телен, мәдрәсәдәге имтиханнарны, андагы курс эшен (иң мөһиме). Ике куянны берьюлы тота белмим шул. Шуңа күрә монда сайларга кирәк иде- нәрсә өстенрәк: мәктәпме яки мәдрәсәме? Айлар буе уйладым, нәрсә сайларга белмәдем, башым катты. Шулай әйтермен дип уйладыгызмы? Юк, ялгышкансыз, киресенчә тиз хәл иттем бу сорауны, чөнки җавабым инде әзер иде минем әллә кайчан. Җә әйтеп карагызчы, актык чиктә нәрсәне сайладым инде? Мәктәпне беренче планга куйдым. Барыбер ЕГЭ бит ул ниндидер мәзәк түгел, аңа алдан яхшы итеп әзерләнергә кирәк, һәрберсе үзен кайгырта, әйтеп, булышып җибәрүче юк анда. Мина кыры сыман, билләһи. Тәк, аңа кадәр ерак әле.
Кышның беренче ае. Салкын. Иртә белән китәсең, кич белән кичке 7-8 ләрдә кайтып керәсең. Ардырган. Хәзер караватка әвәргә генә иде дип хыялланасың. Ләкин кая анда әвергә әле. Башта мәдрсәдә бирелгән өй эшләрен, аннан мәктәптә бирелгәннәрен эшлисен, анда инде өстәл артында бер нәрсә аңламыйча, яшелчә кебек утырасың, бераз курс эшен эшләп аласың да башкага хәл калмый. Иртәрәк кайткан көннәрдә рус әдәбияты белән генә утыра идем. Алга китеш көннән-көн үсә иде. Мәгълүмат күп. Барысында истә калдырып та булмый. Баш кайный. Рус теленә җәй көн үк башлаган идем әзерләнергә, шуңа күрә аңа ул кадәр игътибар бирмәдем, алай да әз генә буш вакыт килеп чыккан саен аның белән шөгельләндем. Курс эшен дә бөтенләйгә онытып булмый бит. Анысын да шулай бераз-бераз чиратлаштырып эшләп килдем.
Биш-алты ай аеруча авыр, үттеләр. "Ничек барысына да элгерергә?" "Ничек барысын да йөреп чыгырга?" Менә шундый уйлар иде минем башымда. Кыен дип әйтү- бер нәрсә дә әйтмәү. Нишләргә инде хәзер? Артка юл юк. Пауза ясап торып булмый. Агым уңаена да "нәрсә булса шул булыр" дип йөзү дөрес түгел. Әзерләнергә, хәлдән килгәнне бөтенесен дә эшләргә кирәк. Хәлдән килгәнне... Ә хәл инде юк. Хәлдән тайганмын... Шул вакытта пәйгамбәребез Мөхәммәд саллә Аллаһу галәйһи сәләм сүзләре исемә килеп төште: "Аллаһы Тәгалә безгә бары без күтәрә ала торган авырлык кына бирә". Димәк, мин бу авырлыкны күтәрә алам. Димәк, мин булдырам, бары тик түзәргә генә кирәк. Күп калмады. Әйе, тиздән бетә. Түз. Түз...
Шулай итеп үземне кулга алдым. Нык булдым. Алга бардым. Рус теленнән имтихан биргәндә бер тамчы да борчылмадым. Чөнки бер шигем дә юк иде- мин аны яхшы балга бирәчәкмен! Рус әдәбияты имтиханында гомумән борчылуга кадәр түгел иде (үтереп башым авыртты, дарулар өчеп бетердем). Курс эшен соңрак тапшырсам да, "5"легә яклап чыктым.
Без барыбызда булдырабыз. Бирелгән авырлыкны барыбызда күтәрә алабыз. Бары тик сабырлык һәм түземлек кирәк!