Хәсәновлар гаиләсе 2024 елны икеләтә сөенеч белән каршы ала: 60 ел иңне‑иңгә куеп яши торган ир белән хатын тагын бер елга пар канат булып аяк басты
Мулла бистәсендә матур пар яши: Галия һәм Хәтим Хәсәновлар. Алар декабрь ахырында гомер бәйрәмнәрен — 60 еллык туйларын билгеләп үтте.
Хәтим абзыйны шәһәрдә белмәгән кеше юктыр. Аны бик уңган, эшчән кеше, дип әйтәләр. Якташыбызның өлгермәгән җире юк: Кыш бабай булып киенеп, үзәк мәйданда тугры дусты Люлю кушаматлы атына утыртып йөртеп, балаларга күп тапкыр шатлыклар бүләк итте. Хәтим аганың берничә ел элек үз ихатасында тәвә кошлары үстерүе дә билгеле. Олы яшьтә булуына карамастан, ул бүген дә актив тормыш белән яши.
Ә инде Галия ханым, гаилә учагын саклап гомер итүче чын татар хатын‑кызы, ул ире өчен ышанычлы тыл.
Галия һәм Хәтим Хәсәновлар бик бай кешеләр — аларның алты оныклары бар, инде ике оныкчыклары үсеп килә.
— Без барыбыз да әти‑әниебезне бик яратабыз. Хәлләрен белешеп, ярдәм итеп, аларның күңелләрен күреп торабыз. Шатланып кунакка киләбез, без бит әле үзебез дә алар өчен бала, — дип елмаеп сөйли юбилярларның өлкән кызлары Гүзәл. — Без ничә яшьтә булуга карамастан, әти‑әни биргән киңәшләр безгә тормыш маягы булып тора. Алар безгә һәрвакыт кирәк һәм терәк!
Хәсәновларның кече уллары Радик тормыш иптәше белән төп йортта дөнья көтәләр. Гүзәл ханым үзе дә алардан ерак яшәми — Мулла бистәсендә гомер итә. Тагын бер уллары Илдар гаиләсе белән Нефтекама шәһәрендә төпләнгән, кече кызлары Айгөл Туймазы районы Карамалы‑Гобәй авылында яши.
Зур бәйрәмнәрдә барысы да туган йортка, әти‑әни җылысы янына ашыга. Яшьләрнең бер‑берсе белән якын итеп аралашуы, аларның үзара шуклыгын һәм шаянлыгын күзәтеп утырган өлкәннәр күңелләре белән кабатланмас хис‑тойгылы яшьлек елларына әйләнеп кайта.
... Егет асылы Хәтимнең Хәтимә исемле апасы янына кунакка килгән чагы була. Челтерәп аккан чишмәгә су алырга төшкән егетнең күзе шулчак кашыкка салып йотарлык чибәр кызга төшә. Җир өстенә бәреп чыгып, таш һәм киртәләрне ера‑ера үзенә юл ярган чишмәдәй, Галия апа белән Хәтим ага да 60 ел тормыш юлыннан атлый. Саф сулы чишмә буенда кыяр‑кыймас кына бер‑берсен алган куллар хәзер дә бергә. Тик алар инде нык һәм көчле куллар. Бриллиант туйга кадәр килеп җитәләр. Әлбәттә, озын‑озак гомер еллары тыныч кына узмый. Инеш‑елга сулары да бит бер карасаң, тыныч ага, икенче караганда, дулап ала...
Ир белән хатын гомер буена эш сөеп, тырышып дөнья көтә. Мулла бистәсендә үзләре
өй салып керә.
Галия апа алдынгы савымчы булып эшли, Хәтим ага терлекләр тәрбияли. Биш нарасыйга гомер бүләк иткән ир белән хатынга бала кайгысы күрергә насыйп була: кызганычка, Хәния исемле кызлары авыр чирдән дөнья куя. Бала югалту хәсрәтен дә алар бергә‑бергә кичерә. Язмыш сынаулары алдында баш имичә, әле дә булса гөрләтеп яши алар.
Лилия СӨЛӘЙМАНОВА
Фото редакция архивыннан