Едэй по тадри луца’ падаркана ӈадимнда. Теда’ ненэй ненэця” сямян Россия’ тер” тотрев’ несэй пом’ ядабтамби”. Ӈарка ненэця”, ӈацекы”, мал” едэй по’ ялям’ ате. Сеяха’ харад’ поӈгана ӈока ялмырта, якнана лампочка юӈгу. Тареӈод’ ӈэрм’ харад’ тер” илека хэбидя ялян’ хамеку”
Несэй по’ хуркари едэй серо минре. Сямян ненэця” тэнз хантаӈгутана похона ӈокавна манзравы”, ӈацекы” тохолковы” Тадри си”ив сян’ яля’ ныланаӈгу”. Тикы яляха”на пыдо’ хуркари манзаи пэрта”. Сеяха’ тер” манзрани’ ӈамгэ мян пеля ӈарка хардаха’ ныланаванзь хая”, тамна хибяхав Саляхардан’ хаяць. Ӈацекы тохоламбунзь товы” хуркари хардахат тэворӈа”. Теда’ пыдо’ ӈобтарем’ харто’ хардахато’ тиртя ӈанохона хэвы”. Ненэй ненэця”, луца”, тамна хуркари ненэцяи” тэнз”” мал ханяри’ ӈэдалы”.
– Тюкы’ по’ группаханана 31 ӈацекэва”. 24 ӈацекэва” первый классахана тохолку”. Си”ив ӈацекэва” школан’ хамекова группахана мэ”. Хубтахана тохолкува”, яля’ няби пеляхана хоныва”, тад пуна паднава”, толаӈго тоходаннава”. Тандая’ утренниква’ ӈась. Тад тикы’ пуд ӈацекы”на” нисянадо’ небянадо’ тоць. Ӈацекы”на ӈокаюм’ пеля хойня’ хаяць, тамна ӈамгэ’ мян хардахана ныланаӈгу”. Интернатхана хаёдава” юкад тяню. Каникул” нюртей яляхана ӈацекы ӈопой группан’ ма”лаӈгуна”. Тикахана воспитатель” манзраӈгу”, хусувэй яля’ хуркари мероприятия, сянакубц мэта”. Хаюрта ӈацекына” серци’ нисеты” ӈамдю”, – Любовь Хоротэтто ма, пыда Сеяха’ тохолкова мякна воспитательӈэ манзра.
Сеяха’ харад’ тер” ӈокаюм’ пеля харто' хардаханандо” хаи”. Пыдо’ мякнандо’ мэ”, хэвнямна ӈэдалёрман’ ни” харва”. Выӈгана илена” ӈобтарем’ хойняна едэй пон’ хамеку”. Ныланава ялэ” нерцюня хардан’ хабейманзь тэворӈаць. Ты пэрти” ӈокаюм’ пелядо’ тохолкода ӈацекыдо’ хойня’ ханэйдонзь. Хасава ӈацекы”, не ӈацекы” ныланава ялэ ёльце ӈатейдонзь. Пыдо’ сямян хибярихит мякто’ паромби”, вынд’ харва”.
– Мань мякни’ хэбнани’ ӈацями’ нядабаӈгудм’, нюдя неӈацекы няханани’ сянакодадм’. Хойняна ёльце сава. Интернатхана ӈани сава ӈэвы. Мань тюкохона тохолкудм’. Тедахав’ буквы падыбива”, цифры тохоламбива”. Учительницава’ Лариса Очевна. Пыда теневанада ӈока. Урокаха”нана хуркари картинкы манэсарӈава”. Мань буквы тохолэйнась. Понедельникхана ёлкан’ хан”ӈаваць. Таняна ӈарка зал танявы. Ӈацекы ёльце ӈокась. Дед Морозм’ манэ” ӈадамсь, няби Снегурочкам’. Праздникм’ мэ” ӈаваць. Ёлкам’ сюртемба сём’ мэ” ӈаваць, траваць. Ёльце савасей, – Меретя Окотэтто ма, пыда нюртей по’ Сеяха’ хардахана хамекова группахана тохолку.
Сёяха’ харад’ тер” едэй по’ ялян’ хамеды”. Мядото’ мюня хуркари якнана” ӈамгэри ляӈгабтавы”, тодо’ тэнз лампочка” сидер” сихи”на ту”на”. Лабкы” мюй’ ӈобтарем’ тэри якна”. Нямэркахана ӈарка пэвдей иры’ нерняӈы яляха”на клуб’ манзрана” мядо”мана ӈэдалёрӈаць. Харто’ ядэрць яӈамна, сэвдоӈ вэварка ӈацекы, тамна хуркари хабця мэта ядабтавыць. Ӈацекы” ёльце ма”ямбиць. Тад тикы’ пуд дом культуры’ манзрана” сайнорти” ню' е”эмня клубахана праздникм’ сертавыць. Хасава” тайна ханяна саю питарманзь хэвы”.
Детский сад’ харад’, школа’, клуб’ хэвхана хуркари сянако”, сырахад сертавы ӈавэ ӈабтавы”. Школахана тохолкоди” ёлкыдо’ миӈаць, несэймдавы актовый залхана ӈаць. Детский садикан’ ханта ӈацекы” ӈобтарем’ праздникм’ мэ”ӈа”. Нюдямбой ӈацекы” е”эмня дом культуры’ манзрана” ӈани’ ёлкам’ сертавыць. Ӈарка пэвдей иры’ 29 яляхана клубахана ӈацекы” ма”лыць. Сиддо’ сянакултамбувнзь хуркари костюмтана то”: Дед Мороз, Снегурочка, тэвасико, клоун’ ӈэдакы”.
Тад тода по савари ӈэя, сямян ненэця” сенз” ӈэя”, сайнорма юӈгоя. Ты пэрти” тыдо’ савовна лэтамбая”, ты” хадырць я сава ӈэя. Хой’ тер” тад нерняю” тамна мюсярӈая”, халям’ пэрӈая”. Харад тер” иландо’ сава ӈэя, ӈацекы” вадёданая”, тохолкоя”, сава тарана серт’ тэворӈая”!
Антонина Серасхова
