Хисеплĕ туссем! Пишпÿлекри Тĕп библиотекăн Пушкăртстанри чăваш халăхĕпе ĕçлекен сектор, Пишпÿлек районĕнчи чăвашсен Канашĕ К.В. Ивановăн «Нарспи» поэми кун çути курнăранпа 115 çул çитнине халалласа «Пĕр юрату историйĕ» (К.В. Ивановăн произведенийĕсене паянхи куçпа хаклани) сочиненисен конкурсне ирттерет. Унта шкул ачисем, ятарлă пĕлÿ паракан вĕрентÿ учрежденийĕсемпе аслă шкулсен студенчĕсем, республикăра пурăнакан ытти çынсем хутшăнма пултараççĕ. Конкурса килнĕ ĕçсене тĕрĕслеме тата пĕтĕмлетме ятарлă жюри йышне палăртĕç.
Мероприятийĕн тĕп тĕллевĕ К.В. Ивановăн пултарулăхне халăх хушшинче анлăрах сарасси, çитĕнекен ăрăва поэтăн литература еткерĕпе паллаштарасси, республикăра пурăнакан сăмах ăстисене шыраса тупса вĕсен пултарулăхне аталантарасси, чăваш сăмахлăхне юратма хăнăхтарасси, тăван чĕлхене упраса хăварма пулăшасси шутланать.
Конкурса чăваш чĕлхипе çырнă ĕçсене йышăнаççĕ. Пултарулăх ĕçĕсене «Нарспи» поэмăна халалламалла. Конкурс пĕр тапхăрпа иртет. Унта уйрăм çынсен ĕçĕсене çеç йышăнаççĕ. Сочиненисене компьютерпа наборланисене те (страница виçи – А4, айккисем - икшер см, шрифт – Times New Roman, кегель – 14, йĕркесем хушши - 1), алăпа çырнисене те йышăнаççĕ (А4). Сочиненисен калăпăшĕ 1 страницăран кая мар, 5 страницăран ытлашши мар пулмалла. Вĕсене рецензилемеççĕ тата тавăрса памаççĕ.
Конкурс ĕçĕсене ÿсĕмĕсене кура хаклаççĕ: 12-14 çулхисем, 15-17 çулхисем, 18-22 çулхисем, 23+ çултан аслисем.
Сочиненисен конкурсĕ октябрь уйăхĕн 23-мĕшĕнчен пуçласа ноябрь уйăхĕн 23-мĕшĕччен пырĕ. Пултарулăх ĕçĕсене ноябрь уйăхĕн 30-мĕшĕнче пĕтĕмлетĕç.
Сочиненисене заявкăпа пĕрле chuv.sector02@mail.ru электронлă почтăпа е 452040 Республика Башкортостан, Бижбулякский район, с. Бижбуляк, ул. Советская, 25 каб. адреспа ямалла, «На конкурс» тесе палăртмалла.
Конкурс пирки çырнă информаципе Пишпÿлекри Тĕп библиотекăн сайтĕнче http://bizh-bibl.ru «Конкурсы» пайра вуласа пĕлме пулать.
Пултарулăх конкурсĕн çĕнтерÿçисене ÿсĕмĕсене кура I, II, III вырăнсене парса дипломсемпе тата асăнмалăх парнесемпе чыслĕç. Ыттисене конкурса хутшăннисене çирĕплетекен сертификат парĕç.
Конкурс пĕтĕмлетĕвĕсене информаципе библиотекăн сайтĕнче http://bizh-bibl.ru декабрь уйăхĕн 1-мĕшĕнчен кая мар пичетлĕç.
Хушма информацие (43347) 2-26-03 Марина Алексеевна Яковлева, (43347) 2-15-75 Надежда Гилидиновна Николаева урлă пĕлме пулать.
Йĕркелÿçĕсем.