Бүген җырчы Рафис Кәлимуллин белән алып баручы Гөлназ Сәфәрова утырган самолет, һава торышы начар булу сәбәпле, Казанда төшә алмаган. Бу хакта алар социаль челтәрләрдә хәбәр итә. Иң начары – көтелмәгән хәл аркасында артистларның икесенә дә бүген кич белән үзләре алып барачак чараларга алмаш эзләргә туры киләчәк.
«Хәлләр начар! Мәскәүдән «Татар җыры»ннан кайтканда, без Казанда төшә алмадык», – дигән Рәфис Кәлимулин.
«Казанда бик каты томан. Шуңа без очтык-очтык-очтык та Түбән Новгородта төштек. Аллаһка шөкер, без икебез дә исән-сау. Әмма икебезнең дә бик зур проблема бар. Минем сәгать 5тә Казанда зур никах башлана», – ди Гөлназ.
«Ә минем Кукмарада зур юбилей башлана», – дигән Рафис.
«Хәзер без такси яллап кайтасы идек. Моннан юл 6-7 сәгать дип күрсәтә. Берничек тә җитешә алмаячакбыз. Хәзер безгә тиз арада алмаш эзләргә кирәк», – дип аптырашта утыра әлеге минутларда артистлар Түбән Новгород аэропортында.