Агымдагы елның 7 ноябрендә Җиңү паркында, хәрби бурычын үтәгәндә һәлак булган сугышчылар мемориалы янына җыелган шәһәр халкы махсус хәрби операциядә батырларча һәлак булган якташыбыз Радик Исламовны соңгы юлга озатты.
Радик Тәлгать улы тумышы белән Октябрьскийдан. Шәһәрнең 13 мәктәбендә укыган егет техник училищеларның берсендә гражданлык һөнәре алган.
2008-2009 елларда Русия Федерациясе Кораллы Көчләр сафларында сроклы хезмәтне ракета-пушка белән коралланган танк механигы-водителе вазыйфасында узган. 2016 елдан алып 2019 елга кадәр контракт буенча хезмәт итүен дәвам иткән.
Безнең дәүләт өчен авыр вакытта Радик Исламов үз теләге белән Донбассны һәм Русиянең яңа төбәкләренең мәнфәгатьләрен нацизм һөҗүменнән якларга карар итә һәм 2023 елның җәендә РФ Оборона министрлыгы белән контракт төзи. Тик 12 октябрьдә аның гомере өзелә. Аңа нибары 33 яшь иде.
Сугышчыны соңгы юлга озатырга күп сандагы шәһәр халкы җыелды. Алар арасында хакимият башлыгы вазыйфаларын башкаручы Алексей Пальчинский, Башкортстан Республикасы Дәүләт Җыелышы — Корылтай депутаты Алексей Шмелев, хәрби комиссар подполковник Валерий Шәрифуллин, сугыш хәрәкәтләре ветераннары, яшьармиячеләр, иҗтимагый оешма вәкилләре бар иде.
Алексей Шмелев җаннарын кайгы сөреме каплаган солдатның әтисе Тәлгать Әгъләм улының, әнисе Әлфия Миңнеәхмәт кызының, туганнарының һәм якыннарының тирән кайгысын уртаклашты.
— Республика җитәкчелеге һәм депутатлар корпусы исеменнән сезнең тирән хәсрәтегезне уртаклашам. Без сезнең белән бергә кайгырабыз. Сезнең белән бергә бөтен шәһәр халкы да хәсрәтләнә. Чөнки без тагын бер кыю улыбызны югалттык. Әмма Радик Тәлгать улы илебез азатлыгы өчен батыр юл сайлады. Мондый җитди адымга бары тик чын ир-егетләр генә бара ала. Менә шундый чын патриот тәрбияләп үстергән өчен без сезнең алда түбәнчелек белән баш иябез, — дип басым ясады Алексей Николаевич.
Шәһәр хакимияте башлыгы вазыйфаларын башкаручы Алексей Пальчинский да Радик Исламовның гаиләсенә теләктәшлек сүзләре белән мөрәҗәгать итте.
— Без бүген илнең генә түгел, иң беренче чиратта туган шәһәребезнең фидакарь улын — соңгы сулышына кадәр биргән антына тугры калган хәрби хезмәткәрне соңгы юлга озатабыз. Мондый ачы кайгылы көндә дөрес сүзләр табуы бик авыр. Әмма сез бүген әлеге авыр югалту кайгысы белән бер ялгызы түгел — Җиңү паркына килгән йөзләгән кешеләр аны уртак итә. Тыныч тормыш, илнең якты киләчәге өчен һәлак булган якташыбызның батыр истәлеге безнең йөрәкләрдә озак сакланачак. Тыныч йокла, Радик! — диде Алексей Евгеньевич.
РФ Кораллы Көчләр кече сержанты Радик Тәлгать улы Исламов Зает бистәсе зиратында җирләнде.
Илмира ГАЛИЕВА
Автор фотолары