Җиңү белән исән-сау әйләнеп кайтыгыз, туган-үскән җирегез сезне көтә — әлеге изге теләкләр белән кыска вакытлы ялдан соң хәрби хезмәткәрләрнең тагын бер төркеме махсус хәрби операция зонасына озатылды.
Җиңү паркында узган тантанада солдатларның хатыннары, балалары, туганнары, дуслары, ил һәм халкы язмышына битараф булмаган шәһәр халкы, сугыш хәрәкәтләре ветераннары, иҗтимагый оешма вәкилләре, яшь буын катнашты.
Икенче тапкыр отпускыга кайткан «Мулла» чакырулы шәһәрдәшебез үзенең хәрби бурычларын үтәүне Запарожье юнәлешендә мотоукчылар гаскәрләре составында дәвам итәчәк. Махсус хәрби операциягә тизрәк нокта куеп, туган якларга әйләнеп кайтыр өчен, ул барлык ир-егетләрне, газиз җирләрен, гаиләләрен, әти-әниләрен, әби-бабаларын, сабыйларын яклап, Ватан сагына басарга чакырды.
Сүз алган шәһәр хакимияте башлыгы вазыйфаларын башкаручы Алексей Пальчинский хәрби бурычларын үтәргә китүче хәрби хезмәткәрләргә мөрәҗәгать итеп, алар алдында авыр һәм катлаулы бурыч торуын билгеләп үтте.
— Ватанны саклау һәм яклау беркайчан да җиңел булмаган. Сез инде елдан артык кулыгызга корал тотып, безнең дәүләт мәнфәгатьләре һәм аның иреге сагында торасыз. Сез чын каһарманнар! Бүгенге чарада катнашучы яшь буын өчен сез батырлык һәм ватанпәрвәрлек үрнәге! Киләчәктә дә без, октябрьскийлылар, кулга-кул тотынып, җиңү көнен якынайту өчен зур тырышлык куячакбыз. Иң мөһиме, сез бергә һәм бердәм булыгыз, үзегезне саклагыз һәм гаиләләрегез янына исән-сау әйләнеп кайтыгыз, — диде ул.
Алексей Евгеньевич хәрби бурычын үтәгәндә күрсәткән фидакарьлеге һәм батырлыгы өчен «Әмир» чакырулы хәрби хезмәткәргә Башкортстан Республикасы башлыгы Радий Хәбировның Рәхмәт хатын тапшырды.
Ирекле формированиеләр штабы начальнигы полковник Альберт Шәйморатов һәм Русия Герое Степан Беловның әнисе Тамара Витальевна Донбасс өчен бара торган кораллы низагта катнашучы якташларыбызга хәерле солдат тормышы теләделәр.
Октябрьский халкы, изге традиция буенча, Ватан азатлыгы хакына һәлак булган солдатларны искә алды һәм хәрби бурычларын үтәгәндә һәлак булган сугышчылар мемориалына чәчәкләр салды.
Илмира ГАЛИЕВА