Кичә Башкортстанның Әбҗәлил районы Әскәр авылында яшь музыкант Артур Кусимовны соңгы юлга озаттылар. Артур белән бәхилләшергә якыннары, туганнары, дуслары, сыйныфташлары, авылдашлары һәм Артурның үлеме тетрәндергән башка бик күп кешеләр җыелган. Бу хакта Әбҗәлил газетасы яза.
Хушлашу мәрасимен хакимият башлыгы урынбасары Вадим Гафаров ачып, хәсрәт килгән гаиләгә кайгыларын уртаклашу сүзләрен җиткергән.
Дустын соңгы юлга озатырга җырчы Элвин Грей да килгән. Искәртеп үтик, җырчы, гастрольләрдә булу сәбәпле, Артур белән Казандагы хушлашу чарасына килә алмаган иде.
«Артурга зур рәхмәтемне әйтәм, ул безнең команданың үсеше өчен бик күп көч куйды. Сине йөрәкләребездә сакларбыз. Нинди генә очраклар булмасын, аннан бер начар сүз дә ишеткән булмады. Бик яхшы кеше иде», – дип искә алган ул дустын.
Туганнары исеменнән Дамир Мирхәйдәров: «Изге күңелле, ярдәмчел егет иде. Туганнарына бик игътибарлы булды. Соңгы очрашуыбызда чәйләр эчтек, ул үзенең сәхифәсендә әнисенә тәмле коймаклары өчен рәхмәт белдерде. Артур белән хушлашу бик авыр», – дигән.
Чарага килгән барлык кешеләр дә Артурның эчкерсезлеге һәм яхшы егет булуы хакында сөйләгән. «Зур йөрәкле кеше, ул башкалар өчен – туганнары, дуслары өчен яшәде», – дигәннәр алар.
Артурны җирләргә аның иҗатташ дуслары да кайткан. «Безгә һәрвакыт яхшы киңәшләр бирде, беркайчан да ярдәм итүдән баш тартмады», – дигән җырчы Ябай Малай.
Ләйсән апасы сәхнәдәш дусларыннан Артурның иҗатын оныттырмауларын, энесе башлаган проектны төгәлләп бетерергә ярдәм итүләрен сораган.
Артур Кусимовны соңгы юлга алкышлар белән озатканнар.
- Артур Кусимов белән иң соңгысы булып сөйләшкән дусты: «Гашыйк булырга курыктымы икән...»
- Музыкант Артур Кусимовны туган авылында җирләгәннәр
- 32 яшьлек музыкант Артур Кусимовның үлеменең сәбәбе билгеле
- Мәрхүм Артур Кусимовның дуслары: «Сөйләшергә җитешмәдек, гафу ит трубканы алмаганга»
