«Берҙәм Рәсәй» партияһының «Аныҡ эштәр» проекты буйынса Шәрип ауылында Бөйөк Ватан һуғышы ветерандары иҫтәлегенә обелиск ремонтланды. Болоҡһоп ямғыр яуыуға ҡарамаҫтан, яңырған обелискты асыу тантанаһында ауыл халҡы, башланғыс мәктәп уҡыусылары әүҙем ҡатнашты.
— Өсөнсө көн тоташ ҡар яуғанда
Һыҙланыуҙан тыуған шиғырын,
Килер быуын аңлай алыр микән
Кисерешен бөйөк шағирҙың?
Дошман пуляһынан алған яра
Оноттормай һуғыш дәһшәтен.
Шағир күңелендә һәр саҡ йәнәш
Ғорурлыҡ һәм нәфрәт йәшәтте...
Шағир тиҫтерҙәре тыныслыҡты
Яулағанға ҡан һәм тир түгеп,
Тормош ауырлығын ғорур үтте,
Йәшәмәне улар теҙ сүгеп...
Шағир йәшәй, тимәк хәтер тере,
Уҡып торһаҡ шағир яҙғанын,
Еңеү ҡәҙерен, данлы үткәндәрҙе
Оноторға ғына яҙмаһын! — тип үҙе яҙған шиғыры менән башланы сығышын Хәмит ауылы биләмәһе башлығы Фирүзә Ғәҙелшина.
— Беҙгә яҡты киләсәк, матур тормош бүләк иткән ата-олатайҙарҙың исемен, уларҙың ҡаһарманлығын онотмайыҡ, йәш быуын Бөйөк Ватан һуғышы ветерандарын белеп үҫһен тигән маҡсатта ошо обелискыны яңырттыҡ. Ремонтты «Аныҡ эштәр» проекты буйынса башҡарҙыҡ, — тине Фирүзә Дилмөхәмәт ҡыҙы. — Әлбиттә, дөйөм эштә ауылдаштар ҙур ярҙам күрһәтте. Исемлектәрҙе яңыртыуҙа Ғөзәйер Абдрахманов, Шәүрә Ямалова һәм ауыл халҡы әүҙемлек күрһәтте.
Подрядсы булған Илгиз Хәйретдинов, эштең бөтә ауырлығын күтәргән Мансур Мөхөтдинов, ойоштороу мәсьәләләрен үҙ өҫтөнә алған ауылдың старостаһы Айрат Мөхөтдинов Рәхмәт хаттары менән бүләкләнде.
Шәрип ауылы халҡы ҡыуанысын район Советы секретары Булат Исламбаев уртаҡлашты.
— 2015 йылдан бирле «Берҙәм Рәсәй» партияһының «Аныҡ эштәр» проекты эшләп килә, уның ярҙамында ауылдарҙа төрлө объекттарҙы яңыртыу-йүнәтеү мөмкин булды. Быға тиклем Шәрип ауылындағы клубҡа ремонт эшләнде, сәхнә кейемдәре һәм йыһаз алынды. Хәмиттә байтаҡ эштәр башҡарылды — Ҡағы йылғаһы аша күпер һалынды, клубҡа сәхнә кейемдәре яңыртылды, мәктәптә тәҙрәләр алыштырылды, обелиск яңыртылды. Быйыл Шәрип ауылында матур мемориаль комплекс барлыҡҡа килде. Бөйөк Ватан һуғышында еңеү яулау өсөн үҙ ҡанын ҡойған ата-олатайҙар хаҡында онотмау, йәш быуынға патриотик рухта тәрбиә биреү өсөн был бик мөһим, изге эш, — тине Булат Юныс улы. — Халыҡсан проекттар арҡаһында күп мәсьәләләр хәл ителә. Шәрип ауылын хәҙер төпкөл тип әйтерлек түгел, һәр саҡ иғтибар үҙәгендә. Бында яңы ФАП асылды, башланғыс мәктәп ремонтланды, телефон бәйләнеше барлыҡҡа килде, ППМИ программаһы буйынса зыярат яңынан кәртәләнде. Яңыраҡ быуа йүнәтелде. Күркәм мәсет сафҡа индерелде, ул эшләп тора. Йәштәр ауылда ҡала, заманса, бөтә уңайлыҡтары булған йорттар һалалар. Әлеге ваҡытта өр-яңы клуб төҙөлә, йыр-моңға маһир Шәрип халҡы өсөн тиҙҙән өр-яңы мәҙәниәт усағы асыласаҡ. Киләһе йылда Хәмиткә газ үтәсәк, тимәк, Шәрипкә лә зәңгәр яғыулыҡ килеп етәсәк. Ыңғай үҙгәрештәр күп, ауыл яҙмышы өсөн янып-көйгән, ошондай эштәрҙә әүҙем, дөргөн ҡатнашҡан шәриптәргә рәхмәт!
Ауыл халҡын иҫтәлекле ваҡиға менән «Берҙәм Рәсәй» партияһының урындағы бүлексәһе башҡарма секретары Рәзинә Әғзәмова, Әбйәлил урман хужалығында бүлек начальнигы Илгиз Кинйәбулатов ҡотланы. Ауыл халҡы исеменән урындағы ветерандар ойошмаһы рәйесе Ғәлиә Килдейәрова, мулла Самат Ғәлләмов сығыш яһап, район етәкселегенә һәм ауылдаштарына ярҙамдары өсөн рәхмәт белдерҙе. «Сәлимәкәй» ансамбленең моңло йыры менән Гүзәлиә Ямалованың матур бейеүе байрам кәйефе өҫтәне.
Булат Исламбаев, Рәзинә Әғзәмова һәм Фирүзә Ғәҙел-шина ал таҫманы киҫкәндән һуң обелискыға сәскәләр һалынды. Яу ҡырында ятып ҡалған һәм еңеү яулап тыуған яҡтарына ҡайтҡан, тыныс тормошта хеҙмәт батырлығы күрһәткән Шәрип ауылы яугирҙәре бер минут тынлыҡ менән иҫкә алынды, улар рухына аят уҡылды. Атай-олатайҙары исемдәре яҙылған ҡара мәрмәрташ янынан өлкәндәр ҙә, балалар ҙа оҙаҡ китмәне. Ауыл уртаһында ҡалҡҡан һәйкәл һәр кем өсөн ҡәҙерле, изге урын булыр...
Автор: Динара Сафиуллина.