Шаршамбы көнө коллегалар менән көҙгө урманға сыҡҡанда алмағасҡа тап булып, бер аҙ алма йыйғайныҡ. Шул алмаға бөгөнгәсә ҡул теймәй йөрөнө. Бөгөн иртәнсәк ҡайнатма ҡайнатып ҡуйҙым, нәкәнис... Ҡайнатып бөттөм дә йәнә урманға киттем. Юҡ, алма йыйырға түгел, былай ғына, ял итергә...
Урмандан ҡайтҡас, подъезд янында тапанып торҙоҡ та, ҡырҡа боролоп, ҡыҙым менән магазинға киттек... Шул саҡ бер ят номер шылтырата.
--Алло, һин ҡайҙа булдың да ҡуйҙың, яңы ғына машинанан килеп төшкәйнең. Инәһең икән тип подъезға сығып көтөп торһам... Неужели өлгөрмәнем, шулай тиҙ менеп киттеңме ни? Бая барып ишегеңде шаҡығайным, асманың, өйҙә булмағанһыңдыр инде... — тип бытылдап, автоматтан атҡандай хәбәрен теҙҙе был.
Шаҡ ҡатып тик торам. Телефонды ҡолаҡтан алып, телефонға тексәйеп алам да кире тыңлайым.Тауышы таныш һымаҡ. Йәй теге телефоным бер биҙрә һыуҙа йөҙгәс, телефон алыштырғайным бит, күп номерҙар юғалған. Әле бытылдаған инәй күрше инәй булып сыҡты, тора торғас таныным тауышынан...
--Әәәә, инәй, мин ни өйгә инмәнем бит, магазинға киткәйнем, хәҙер ҡайтам.
Бына шулай, контроль көслө. Ҡайҙа киткәнеңде, ҡасан ҡайтҡаныңды күҙәтеп кенә торалар ул.
Магазиндан ҡайтып үҙем йәшәгән ҡатҡа күтәрелә башлағайным, шып итеп аҫтағы күрше инәйҙең ишеге асылып китте. Үҙе өндәшмәй, мут йылмайып, ҡулын болғай. Имеш, әйҙә, үтегеҙ, инегеҙ... Оло кеше һүҙен йығып буламы, эйәртенешеп инеп киттек.
--Мин һеҙгә ваннамды күрһәткем килә, - тимәһенме.
Аптыра ла кит инде.
— Ремонт эшләткәйнем, — ти күрше инәй, — бына ҡарағыҙ әле.
— Ооо, ҡайһылай матур!!!
--Эйе. 130 мең китте.
— Шәп бит әй.
--Бына был штораһын ҡыҙым интернеттан заказ менән алып бирҙе, раковинаны Магнитогорскиҙан алдыҡ... — тип инәй барыһын теҙеп һалды.
--Ярай, инәй, ҡотло булһын! Бик матур булған! Ҡыуанып йәшәгеҙ, —тип һаубуллашып сығайым тиһәм, туҡтарға ҡушты.
Аш бүлмәһенән бер мешок алма сығарып тотторҙо.
Иртәнсәк кенә алмамды ҡайнатып ҡотолғайным да һуң... Был хаҡта өндәшеп торманым инде, алманы алып, рәхмәт әйтеп үҙемдең фатирға күтәрелдем.
Бер аҙҙан фатирымда алма бәлеше еҫе сыға ине... Бер нисә ваҡ бәлеш (алманан) биреп, бүләк ҡушып, ҡыҙымды инәйгә йүгерттем... Ололар көнө менән ҡотларға... Үҙем фатир ишегенән башты тығып ҡына подъезға ҡарап торам... Ҡыҙым баҫҡыс буйлап йүгереп төштө, ишек шаҡыны. Ишек асылды. Таныш тауыш яңғырап китте:
--Уйййй, бәпәй генәмде, рәхмәт яуғырҙары. Рәхмәт. Ҡана, һөйөп алайым. Ҡана әле, үбеп алайым... Рәхмәт! Рәхмәт! Әсәйеңә рәхмәт әйт. Иииий, һау ғына булығыҙ инде...
Оло кешегә күп кәрәкме инде?!