«Семнадцать мгновений весны» һәм «Интердевочка» фильмнарындагы рольләре белән танылган, Россиянең атказанган артисткасы Наталия Дрожжинаның, закон белән проблемалары сәбәпле, йөрәге авырта башлаган. Бу хакта LIFE сайты яза.
SHOT телеграм-каналы язганча, актриса хәлсезлеккә һәм тыны кысылуга зарланып, табибларга мөрәҗәгать иткән. Тикшеренгәч, актрисаның инфаркттан соң ишемия авыруы, югары кан басымы һәм кан йөреше кинәт бозылу аркасында килеп чыккан йокы артериясе синдромы барлыгы ачыклана.
Хәзерге вакытта Дрожжина тикшерүләр уза. Шуннан соң табиблар аның дәвалануына үзгәрешләр кертәчәк.
Наталия Дрожжина криминаль җәнҗалга эләкте. Тикшерү версиясе буенча, ул ире Михаил Цивин белән бергә актер Алексей Баталовның тол хатыны һәм кызының ышанычын яулап ала һәм 2019-2020 елларда аларның банк счетларыннан 20 миллионнан артык акча ала. Моннан тыш, Наталия белән Михаил вафат булган актерның Мәскәү үзәгендәге фатирын үзләренеке итә һәм икенче фатирның өлешенә ия була. Гомуми зыян 58 миллион дип исәпләнә.
Бу елның маенда Наталия Дрожжина «милек урлауда гаепле» дип табылды һәм шартлы рәвештә 4 ел алды, ә Михаил Цивинны 5 елга колониягә җибәрделәр. Баталовның тол хатыны суд карары белән риза түгел һәм атказанган артисткага реаль срок бирүләренә ирешергә тели.
