Ацы аз Хетӕджы Уастырджийы бӕрӕгбон ӕрцыд сусӕны мӕйы (июлы) дыккаг хуыцаубонмӕ — 9 июлмӕ. Йӕ кувӕндон кӕд Алагиры районы зӕххыл Куырттаты комӕй рахизӕны дӕлвӕзы ис, ӕмӕ йӕм кӕд райдайӕны кувынмӕ йӕ алыварс хъӕутӕ Суадаг, Ногхъӕу, Хъӕдгӕрон, Дзуарыхъӕу, Хӕтӕлдон ӕмӕ ӕндӕр хъӕуты цӕрджыты йеддӕмӕ стӕм цыд, уӕд ныр ацы кувӕндон ссис ӕппӕтиронадӕмон. Уымӕн ӕмӕ Уастырджи ӕппӕт ирон адӕмыл аудӕг зӕд у, иудадзыг Хуыцауы раз ис ӕмӕ Ирыстонмӕ ӕртӕхгӕйӕ ирон адӕмӕн Хуыцауы хӕрзтӕ чи ӕрхӕссы, уыцы рӕстаг, хӕларзӕрдӕ ӕмӕ ӕргом зӕд у.
Йӕ кувӕндоны равзӕрд
Раджы заман, 14-ӕм ӕнусы, нӕ рагфыдӕлтӕ аланты Тимуры фыдгӕндтӕй йӕ ӕфсӕдты ӕрдонгтӕ бындзагъд ныккӕнын куы сфӕнд кодтой, уӕд ма дзы къордтӕ-къордтӕ цӕргӕйӕ баззад абоны Кӕсӕджы, Хъӕрӕсе ӕмӕ Хъубаны зӕххыл — сӕ фыдӕлты зӕххыл, Хъубаны цӕугӕдоны къабаз Стыр Зеленчукы был уыдонӕй цард къниаз Инал. Уыд ын ӕртӕ фырты: Биаслан, Аслӕнбег ӕмӕ Хетӕг. «Биаслан ссис кӕсӕджы кънйӕзтӕн сӕ мыггаджы фыдӕл. Аслӕнбег уыд ӕнӕзӕнӕг», — афтӕ фыссы Къоста йӕ этнографион очерк «Особа»-йы.
Кӕсӕджы пысылмон дин куы стыхджын, Зеленчукы зылды алайнаг ирон чырыстон аргъуан та цаудмӕ куы ӕрхаудта, бынтон куы сӕдых, уӕд дӕр Хетӕг йӕ ирон диныл йӕ къух нӕ систа. Уый тыххӕй йӕм суанг йӕ бинонтӕ дӕр сфыдӕх сты, сӕхиуыл ӕй нал нымадтой. Уӕд Хетӕг йӕ сӕр райста Ирыстонмӕ. Уый йе знӕгтӕ куы базыдтой, уӕд ӕй, сӕ дин сын кӕй нӕ райста, уый тыххӕй йӕ амарын сфӕнд кодтой ӕмӕ йӕ фӕсте расырдтой.
Хетӕг ӕрбаирвӕзт ӕрджынарӕгӕй ӕмӕ йӕ ных сарӕзта Куырттаты комы ‘рдӕм. Фӕлӕ, абон Суададжы хъӕу кӕм ис, уырдӕм хӕстӕг куы ӕрбахӕццӕ, уӕд ӕй знӕгтӕ дӕр ӕрбацӕйӕййӕфтой. Уыцы рӕстӕг ӕм Суададжы сӕрмӕ хъӕды фахсӕй фехъуыст хъӕр:
— Хетӕг, хъӕдмӕ!!! Хъӕдмӕ!
— Хетӕг хъӕдмӕ нал бахӕццӕ уыдзӕн, фӕлӕ хъӕд — Хетӕгмӕ! — дзуапп радта Хетӕг йӕ хӕрзгӕнӕгӕн.
Уыйадыл хъӕдӕмбӕрзт хохы фахсӕй хъӕд тыгуырӕй сыстад ӕмӕ Хетӕджы алыварс тымбылӕй февзӕрд, знӕгтӕй йӕ бааууон кодта, бахъахъхъӕдта. Уыдон фыртӕссӕй фӕстӕмӕ лидзӕг фесты.
Афтӕ, дам, равзӕрд, Хетӕджы къох, Хетӕджы Уастырджийы кувӕндон, Тымбылхъӕды дзуар. Хъӕд кӕцӕй сыстад, уыцы бынат фахсыл абон дӕр у гӕмӕх.
Зӕгъынц, къохы астӕу, дам, уыд сатӕг суадон. Хетӕг фӕлладӕй йӕ дойны кӕмӕй басаста, уый. Ам иудзӕвгар фӕци, стӕй Куырттаты комыл ахызт Нармӕ. Куырттатӕгтӕн радзырдта, дӕлвӕзы йӕ Уастырджи знӕгтӕй куыд ӕмӕ кӕм фервӕзын кодта, уый. Куырттатӕгтӕ йын сбӕрӕг кодтой йӕ бынат ӕмӕ Дзывгъисы Уастырджийы бӕрӕгбонмӕ гӕсгӕ йӕ бон. Уӕд фӕзынд Хетӕджы Уастырджийы бӕрӕгбон, ӕмӕ йӕ фыццагдӕр йӕ боны бӕрӕг кӕнын райдыдтой куырттатӕгтӕ. Къох ныр ссис Ирыстоны кувӕндӕтты сӕйрагдӕртӕй иу.
«Кӕддӕр Уастырджи Хетӕгӕн цы ӕххуыс бакодта, сымахӕн дӕр уыйау уӕ хъахъхъӕнӕг куыд уа, уыцы амонд уӕ уӕд!» — ныр афтӕ арӕх фӕкувынц ирон адӕм кӕрӕдзийӕн.
Фыдыбӕстӕйы Стыр хӕсты агъоммӕ йӕ бынмӕ сылгоймаг нӕ цыд, йӕ ном ын ныр дӕр нӕ дзурынц. Тымбылхъӕды дзуар ӕй уыдон хонынц. Сӕ кувинӕгтӕ ӕмӕ мысайнӕгтӕ-иу мидӕмӕ дзуарылӕг сӕ скува, сӕ бинонты, сӕ хӕстонты, бӕлццӕтты, рынчыны йыл бафӕдзӕхса, уый тыххӕй барвыстой нӕлгоймӕгтӕй искӕмӕн, суанг къаннӕг лӕппутӕн дӕр. Хетӕджы къохы бынмӕ нӕлгоймӕгтӕ ефс бӕхтыл дӕр нӕ цыдысты.
Хӕсты тызмӕг азты хӕстхъом нӕлгоймӕгтӕ тохы быдыры цагъды куы кодтой, ӕмӕ алчи йӕ бӕлццоны, мӕлӕтӕй йын тӕрсгӕйӕ, Хетӕджы Уастырджийыл бафӕдзӕхсынмӕ йӕхи куы ивӕзта, афтӕмӕй йын йе ‘ртӕ ӕртӕдзыхонӕй йӕ быны скувӕг нӕлгоймаг куы нал уыд, уӕд ирон сылгоймаг ахызт ацы ӕгъдауы сӕрты. Ныййарджытӕ, устытӕ, чызджытӕ сӕ хӕстонты Тымбылхъӕды кувӕндоны Лӕгты дзуарыл фӕдзӕхстой сӕхӕдӕг.
Хетӕджы къохы бӕлӕстӕн ам ӕввахс хъӕдты ӕмбал нӕй — бӕрзонд фӕцыдысты, уӕрӕх ныззылдысты. Кӕрз бӕласы бӕрзӕнд дзы хӕццӕ кӕны 40 метрмӕ, йӕ зӕнг — 2 метрмӕ. Иуӕй йӕ ран хъӕздыг у мӕрӕй, иннӕмӕй кувӕндон у, адӕмы фарнӕй — ӕвӕджиау хайджын. Цард-цӕрӕнбонты йӕ ирон адӕм цӕстыгагуыйау хъахъхъӕдтой, къалиу расӕттын, сыф рахӕссын дӕр дзы нӕ фӕтчы. Къохы алыварс ныллӕг хъӕдгӕндтӕ бирӕ уыд. Уыдонӕй, стӕй стыр хъӕдӕй дӕр ӕм сырд арӕх ӕфтыд, ӕмӕ уый амарын дӕр не ‘мбӕлд. Къохмӕ хӕстӕг хъӕды мард сырдӕй та дзуары бын кодтой куывд, хӕдзармӕ хӕссӕн дзы нӕ уыд. Къохӕн йӕ хуылфы, стӕй йӕ хурныгуылӕн фарс цы суадӕттӕ уыд, уыдоны сатӕг донӕй дӕр Уастырджимӕ кувгӕ кодтой.
Хетӕджы бынӕй хӕдзармӕ сыфтӕр дӕр рахӕссын кӕй нӕ фӕтчы, куы рахӕссай, уӕд та дӕ был, ӕфсӕр, цӕстытӕ, кӕнӕ бӕрзӕй кӕй ныззылын уыдзӕн, суанг куырм дӕр кӕй бауыдзынӕ, уый фӕдыл бирӕ хабӕрттӕ фехъусӕн вӕййы. Цы дыргътӕ: кӕрдотӕ, ӕнгузтӕ, ӕхсӕртӕ, ӕхсынцъытӕ ӕмӕ ӕндӕртӕ дзы ис, уыдонӕй дӕр хӕрӕн ис ӕрмӕст уым, кӕнӕ рахӕссӕн къохы алыварс хӕстӕг быдыртӕм.
***
Хетӕджы Уастырджийы кувӕндоны бынмӕ ныры дуджы сӕ кувинӕгтимӕ цӕуынц Ирыстоны ӕппӕт рӕттӕй дӕр: Цӕгатӕй — Хуссармӕ, Хурыскӕсӕнӕй — Хурныгуылӕнмӕ. ӕмӕ уый хуымӕтӕджы нӕу: фӕдзӕхсынц ыл сӕ кӕстӕрты, сӕ бӕлццӕтты, сӕ рынчынты, сӕ арфӕйаг хъуыддӕгтӕ, сӕхи ӕмӕ, куыд ӕргом зӕд у, афтӕ сын ӕргом ӕххуыс кӕны.
Ныр дӕр та Хетӕджы Уастырджийы кувӕндонмӕ ирон адӕм цӕудзысты рухс зӕрдӕтимӕ, хъӕлдзӕгӕй, йӕ хорзӕх рахӕссын ӕнхъӕлӕй. Ӕмӕ дзы ӕдзухдӕр райгонд куыд уӕм, уыцы хорздзинад нын йӕ цӕст бауарзӕд. Табу йын кӕнӕм ӕмӕ, нын ӕдзухдӕр табуйаг куыд уа. Нӕ кувинаг ын барст уӕд, нӕ мысайнаг — ист. ӕмӕ нын цӕмӕй нӕ куывдтытӕ иса, уый тыххӕй кувӕндоны ӕгъдӕуттӕ халын нӕ хъӕуы.
Ӕрвылаз дӕр Хетӕджы Уастырджийы бӕрӕгбоны йӕ кувӕндонмӕ куывддоны ӕрбацӕуынц бирӕ дзыллӕтӕ. Кӕй зӕгъын ӕй хъӕуы, табу кӕнынмӕ, кувынмӕ. Фӕлӕ се ‘хсӕн вӕййы ахӕмтӕ дӕр, сӕ уаг, се ‘гъдау, сӕ дзаумайы конд нывыл кӕмӕн нӕ вӕййы. Кувӕндоны бынмӕ расыгӕй цӕуын, стӕй дзы расыг кӕнын дӕр нӕ фӕтчы. Нӕ фыдӕлтӕ йӕ быны ӕртӕ сидтӕй фылдӕр нӕ кодтой: Стыр Хуыцауы, Уастырджийы ӕмӕ куывддонты, кӕнӕ кувинаг цы хъӕубӕстӕй, сыхбӕстӕйӕ ӕрбахастой, уыдоны сыл бафӕдзӕхсыны сидтытӕ.
Кувӕндонмӕ не ‘мбӕлы цӕуын ӕнӕхсадӕй, ӕнӕдастӕй, спортивон ӕмӕ ӕндӕр ронбӕгъд уӕлӕдарӕсы, хӕцӕнгарзимӕ, хъамаимӕ цӕуын ӕм нӕ фӕтчы. Йӕ быны нӕлгоймаг хъуамӕ уа худаист, аив конд, ирд сыгъдӕг уӕлӕдарӕсы. Афтӕ сылгоймаг дӕр: ирд сыгъдӕг уӕлӕдарӕсы. Раздӕр кувӕндонмӕ сылгоймаг ӕнӕ сӕрбӕттӕнӕй нӕ цыд. Ныр дӕр сӕ аргъуанмӕ ӕнӕ сӕрбӕттӕнӕй нӕ уадзынц. Кувӕндоны бын уыцы ӕгъдау фехӕлдтой, ӕмӕ сын уый фаг нӕ разынд: цӕуын ӕм райдыдтой гомзӕнг, гомцонг, гомриу ӕмӕ ма гомгуыбынтӕй дӕр. Даргъфадыг хӕлафджынтӕ дӕр дзы фӕзынынц. Ӕмӕ сын макӕ зӕгъӕг нӕй; дзуарылӕгтӕ мысайнаг ӕмбырд кӕнынӕй уӕлдай сӕхимӕ ӕндӕр хӕстӕ нал исынц.
Мысайнаджы тыххӕй та нӕм ахӕм хабӕрттӕ райтынг ӕмӕ худинагдӕр, аллайагдӕр цы хъуамӕ уа нӕ ирон царды! Нӕ кувинӕгтӕ дӕр нын уымӕн нал исынц, ӕвӕццӕгӕн, Стыр Хуыцау, йе сконд зӕдтӕ ӕмӕ дауджытӕ. Ӕмӕ ныл бӕллӕхтӕ дӕр уымӕн цӕуы! Цӕмӕй мысайнӕгтӕм иуӕй-иу дзуарылӕгтӕ ма цыбӕл кӕной, уый тыххӕй кувӕндоны ӕвӕрын хъӕуы мысайнагӕн ӕхсад згъӕр ӕхцатӕ. Гӕххӕттын ӕхцайӕн ӕхсӕн нӕй, ӕмӕ йӕ чъизийӕ ӕвӕрын нӕ фӕтчы. Иннӕмӕй та мысайнӕгтӕн дӕр ӕрмӕст сӕ кӕцыдӕр чысыл хай — фӕтчыхъӕдӕн — сисгӕ у иумӕйаг куывдӕн. Иннӕтӕ хардзгӕнгӕ сты кувӕндоны аивдзинадыл, ирон ӕгъдӕутты рӕсугъд хъуыддӕгтыл. Хъӕугуывдтӕн нӕ, фӕлӕ… Ахӕм куывдӕн та куывддонтӕ ӕрӕвӕрынц сӕхи сӕрмагонд мысайнӕгтӕ.
Кувӕндон адӕймаджы хъӕздыгдзинад ӕвдисӕн бынат нӕу! Сыгъдӕг зӕрдӕйӕ йӕм цӕуын хъӕуы, дӕ бон цӕмӕй у, уымӕй йӕ сбуц кӕн рӕдауӕй: ӕртӕ ӕртӕдзыхонӕй, бӕгӕныйы къус ӕмӕ дзыккайӕ дӕр фӕуӕд. Нӕ мӕгуыр фыдӕлтӕн сӕ фылдӕрӕн сӕ кувинаг ӕрмӕстдӕр адон уыдысты. Мысайнаг та ӕвӕрдтой ӕртӕ суарийы — 15 капеччы. Ныр дӕр ӕртӕ згъӕр фондз сомы ӕгъгъӕд сты мысайнагӕн. Гъемӕ та сӕ Хетӕджы Уастырджийы кувӕндонмӕ куыд зӕрдӕхӕларӕй, рӕдауӕй, куыд хорзӕнхъӕлӕй бахӕссӕм, уый бӕрц нын арфӕйаг фӕуӕнт!
ЦГЪОЙТЫ Хазби
