~~~~~С И Й Р А Т~~~~
Ҳаким ЗОКИР
Одатда ота-бола бирйӯла шеърият йӯлидан йӯналувчи шоирлар унчалик кӯп учрамайди. Мен номлаётган ота-болалар эса ҳамқишлоқларим. Ота - Шукруллахон Авлиёзода (руҳлари шод бӯлсин) Қирғизистоннинг Лайлак ноҳияси Тагоб қишлоғидан Тожикистоннинг Хужанд ноҳияси Овчиқалъача қишлоғига оиласи билан кӯчиб келади, қишлоқдаги 37-ӯрта мактабда китобхоначи, ӯзбек тили ва адабиёти ӯқитувчиси вазифаларида то нафақага чиққунча фаолият юритади.
Шоир мактабдаги адабиёт тӯгарагига раҳбарлик қилар, ёшларни ижодкорликка даъват этарди. Унинг ҳуснихати билан тенглашадиган ёзув йӯқ эди десам, ишонаверинг. Район деворий газеталари кӯригида устоз бош бӯлган "Ёш ленинчи" ҳамиша мукофотли ӯринни эгалларди.
Шукруллохон ака каминада қаламкашликка рағбат уйготган энг яқин маслаҳатгӯйим ҳам эди. 15 йилча устозу шогирдлар гапхӯрлик қилдик. Даврамизда барчамизнинг устозимиз, филология фанлари номзоди, Тожикистонда хизмат кӯрсатган ходим, Тожикистон, Ӯзбекистон ва Қирғизистонда фаолият юритаётган кӯплаб ӯқитувчиларнинг устози Ҳомиджон Мамадов, кӯплаб шогирдларга беминнат раҳбар бӯлган, доно, тарих ва адабиёт билимдони Абдуазиз Болтабоев, Тожикистонда таниқли шоир ва таржимон Шариф Нуриддин, қирғизистонлик оқин Илаш Тӯйчилар бор эди. Шоирлар ҳар гал янги шеърларидан ӯқишар, бизлар маза қилиб тинглардик, уларни муҳокама, таҳлил қилардик. Камина газета ва журнал масъули сифатида уларни нашрга олиб кетардим. Чоп этилган кунлар байрамга айланарди.
Шукруллахон ака менинг ҳар бир ёзган нарсамнинг ютуқ ва камчилигини таҳлил этишга ҳаракат қилар, ҳар бир китобим учун астойдил қувонар эди.
Шоирнинг ӯғли Авлиёхон ҳам ота йӯлидан борди, шеърият сир-асрорини чуқур ӯрганди, Қирғизистон, Ӯзбекистон Ёзувчилар уюшмалари аъзолигига қабул бӯлди.
Бугун Шукруллахон ака орамизда йӯқ, лекин ёзиб қолдирган шеърлари унинг барҳаёт эканидан дарак бериб турибди. Эсладик, руҳлари шод бӯлсин.
Т Ӯ Р Т Л И К Л А Р
Бошимда Ҳақ сӯзни байроқ қилдим,
Иймонни қӯриқчи - ҳамроҳ қилдим.
Гуноҳдан қорайган тош - кӯнгилни
Илоҳ нури ила оппоқ қилдим.
***
Не бӯлди, билмадим, юрагим шошди,
Йиқилдим... одамлар ҳар ёнга қочди.
Турдим, юра кетдим қаддимни тутиб,
Оломон олқишлаб менга йӯл очди.
***
Ҳақ учун йиғлаган зор керак бизга,
Ҳақ каби покдоман ёр керак бизга.
Эй золим, ошиқ деб осмоқчи бӯлсанг,
Мансурнинг доридек дор керак бизга.
***
Мен гоҳ ёғли, гоҳида ёвғон еб ӯтдим,
Дунёни демадим, қадрим деб ӯтдим.
Қорнига йиғлаган одамни кӯриб,
Нафсим борлигига афсус еб ӯтдим.
***
Илоҳо, дунёни тӯқларга бергин,
Юҳонинг нафсини суқларга бергин.
Туну кун роз айтиб, зикрингни қилсин,
Сабру қаноатни йӯқларга бергин.
***
Қӯша келин олдим, вақт тиғиз бӯлди,
Алёрлар айтилди, "сен"лар "сиз"бӯлди.
Икковин тенг кӯрдим боламдек, ажаб,
Бири келин бӯлди, бири қиз бӯлди.
***
Ӯткинчи дунё бу, ӯтамиз, дӯстим,
Дунё қолар, бизлар кетамиз, дӯстим.
Дӯст дӯстни сотқучи сотқин дунёда
Ӯзинг айт, қолиб ҳам нетамиз, дӯстим.