Казан мәктәбендә балалар үтергән Илназ Галәвиевка сөйләшергә ярамаячак

Казанның 175нче гимназиясендә 9 кешене, шул исәптән 7 баланы, атып үтергән Илназ Галәвиевка бүген тагын бер тапкыр хөкем карары укылды. Бу юлы суд Түбән Новгородта булды. Гомуми юрисдикциядәге дүртенче апелляция суды Галәвиевны гомерлеккә иректән мәхрүм итү турында хөкем карарын үз көчендә калдырды. Балалар тормышын өзгән егеткә калган бөтен гомерен махсус режимлы төзәтү колониясендә үткәрергә туры киләчәк.

• «Моргка алып киткәннәр икән шул». Казанның 175 гимназия укучысы турында туганнары
• 175нче гимназиядә атыш оештырган Галәвиев эшен тикшерү азагына якынлаша
• 175 мәктәптәге вахтерның кызы: «Әни йоклаганда да:«Балаларны коткарыгыз» дип саташа»

Искәртеп үтик, Илназ Галәвиевның адвокаты хөкем карарын кире кагуны һәм эшне яңадан карауны сораган иде. Ул үткәрелгән экспертиза нәтиҗәләре белән килешмәгән. Адвокат ике экспертизаның нәтиҗәләре бер-берсенә каршы килүен искәрткән, әмма апелляция суды Татарстан Югары суды чыгарган хөкем карарын үзгәрешсез калдырды, апелляция шикаятьләрен канәгатьләндермәде.

Исегезгә төшерәбез, Илназ Галәвиев 2021 елның маенда Казанның 175нче гимназиясендә 9 кешене, шул исәптән 7 баланы, атып үтерде. Зыян күрүчеләр исемлегендә 600дән артык кеше бар.

Илназ Галәвиев нинди шартларда яшәячәк?

Адвокат Руслан Нагиев «Интертат» хәбәрчесенә махсус режимлы колониянең гомуми режимлысыннан ничек аерылганын аңлатты.

Махсус режим – ул җинаять җәзасының иң югары дәрәҗәсе. Гадәттә, махсус режимлы колониягә аеруча куркыныч җинаятьчеләр, гомерлеккә хөкем ителгән кешеләр озатыла. Алар качып китмәсен өчен көчәйтелгән сак астында тотыла. Гади колонияләрдә тоткыннар баракларда яшәсә, махсус режимлы колониядә 2 кешелек камераларда тора. Махсус режимлы колониядә тотылу шартлары 3 төрлегә бүленә – җиңеләйтелгән, гадәти һәм кырыс. Беренче 5 елында, гадәттә, иң кырысы бирелә. Тоткынның тәртибе яхшы булса, шартларны җиңеләйтергә, берәр эш бирергә мөмкиннәр. Махсус режимлы колониянең кырыс шартларында якыннар белән күрешүләр елга 1-2 мәртәбә, бандероль алу елга 1 тапкыр, саф һавада йөрү көнгә 1,5 сәгать рөхсәт ителә. Чагыштыру өчен, гадәти режимлы колонияләрдә саф һавада йөрү вакыт буенча чикләнмәгән, – дип аңлатты Руслан Нагиев.

sizo.ru сайты махсус режимлы колониянең кырыс шартлары турында түбәндәгеләрне санап күрсәтә:

• камерада 2-4 кеше яши;
• төрмәдәге башка тоткыннардан изоляциядә яши, эш урынында 3тән артык кеше булмый;
• башка утыручылар белән сөйләшү тыела;
• камерага өстәмә рәшәткәләр куела;
• төрмә буенча хәрәкәт итү куллар арттан бәйләнгән һәм гәүдә бөгелгән килеш сак астында оештырыла;
• хезмәт хакының 70 процентын гына тоткын үзе өчен тота ала.