Путин Пригожин белән очрашкан

Путинның матбугат хезмәте җитәкчесе Дмитрий Песков президентның «Вагнер» хосусый хәрби ширкәте җитәкчесе Евгений Пригожин белән очрашканын әйткән. Бу сөйләшүдә «Вагнер» отряды командирлары һәм Пригожин компаниясе җитәкчеләре – барлыгы 35 кеше катнашкан, дип хәбәр итә РИА Новости.

Дмитрий Песков әйтүенчә, очрашу Кремльдә 29 июньдә, хәрби фетнә омтылышыннан соң 5 көн узгач булган. Сөйләшү 3 сәгать диярлек барган, дип хәбәр итә Песков.

Путин махсус хәрби операциядә хәрби ширкәтнең эшчәнлегенә һәм 24 июнь вакыйгаларына бәя биргән, «Вагнер» командирларын тыңлаган һәм аларга киләчәктә нинди эшкә урнашырга мөмкин икәнлеге турында киңәш биргән.

Песков әйтүенчә, «Вагнер» вәкилләре дәүләт җитәкчесенең тарафдарлары һәм солдатлары булуларын әйткән.

Песковтан, бу очрашуда Оборона министрлыгы вәкилләре булганмы, дип сораганнар. Ул бу сорауга җавап бирмәгән.

24 июньгә каршы төндә «Вагнер» хәрбиләре Донда Ростов шәһәрендәге Көньяк хәрби округ штабын басып алды. Бу вакыйгага кадәр Пригожин Россия хәрбиләрен «Вагнер» отрядларының тылларын бомбага тотуда гаепләгән иде. Оборона министрлыгы Пригожинның бу сүзләрен «ялган» дип атады, ФСБ җинаять эше кузгатты, Путин моны «хыянәт һәм авантюра» дип атады.

«Вагнер» отрядлары Мәскәүгә таба хәрәкәт итә башлады, Беларусь президенты Лукашенко сөйләшүе нәтиҗәсендә, «Вагнер» гаскәрләре хәрәкәтне туктатты һәм Беларуська күченәчәген әйтте. Пригожинга каршы башланган җинаять эше туктатылды.

Социаль челтәрләрдә «Вагнер»ның Беларусь дәүләтендә икәнлеген күрсәткән видеолар чыга.