***
(...Гуруҳдаги "Дунёга қайта келсангиз умр йўлдошингиз билан турмуш қурармидингиз?" деган постга жавоб)
***
Баъзида қоқилдим,
баъзан йиқилдим,
Ўрга юмалади
гоҳида тошим.
Мен қаҳр улашсам,
сен меҳр бердинг,
Бу қандай савдодир,
Умр йўлдошим?!...
Гоҳ ташбеҳ ахтарсам
унутиб сени,
Пешонамга қараб
маъно излайсан.
Манглайга битилган
фариштам менинг,
Ҳатто...
боламизни
сизлайсан.
Ҳавасда,
кимнинг ҳам
хаёли кетмас,
Товусдек товланган
сатанглар сари.
Англадим,
ҳеч бири
ўзингга етмас -
Бир гап кам,
икки гап ортиқдир
бари.
Биламан,
вақтинг йўқ
китоб ўқишга,
Аёлнинг ижоди -
ўчоқхонаси.
Сенинг улуғлардан
улуғ рутбанг бор,
Мен берган унвон бу:
"Онаси"
Мен бахилдан баъзан
ширин сўз кутсанг,
Телефонни қучиб
ухлаб қоламан.
Эшитей,
дунёга
минг бора келсам,
Минг бора...
минг бора...
сени оламан!