Нечун тушларимга кирдинг, Дилобар?
И.Тўхтамишев
Иккимиз севардик бир-биримизни,
Гуноҳкор қилмайлик тақдиримизни.
Айбламоқ керакдир ўз-ўзимизни,
Нечун тушларимга кирдинг яна Сен?
Тунлари сенимас, ҳижрон қучарман,
Ёнингга ҳаёлан гоҳо учарман.
Севгидан кечганлар дилдан кечаркан,
Нечун тушларимга кирдинг яна Сен?
Тақдиринг шул экан, не ҳам қиларсан,
Севмасдан ўзганинг ёри бўларсан.
Мен ҳам балки сенсиз бахтли бўларман,
Нечун тушларимга кирдинг яна Сен?
Дилни азоблайди биргина савол,
Кечирармикансан, қошлари ҳилол?!
Ўтинчим шул, сенга келмасин малол,
Нечун тушларимга кирдинг яна Сен?
Юрагим потирлар, танам бир қафас,
Тушларимга кирма, бўлди, энди бас.
Тунлари тинч қўйгин, мени бир нафас,
Нечун тушларимга кирдинг яна Сен?